Category: සැළලිහිණියේ සිත්ගත් කවි
සැලළිහිණි සංදේශයේ සිත්ගත් කවි
විදෙන ලෙළෙන නරුබර පුළුලුකුලැ රැඳී
හෙලන නඟන අත නුවනග බැලුම් දිදී
රුවින දිලෙන අබරණ කැලුම ගත යෙදී
සැලෙන පහන සිළු වැනි රඟන ලිය සැදී
වටා විහිදෙමින් ලෙලදෙන්නා වූ නෙරිපොට දැවටූ උකුල ඇති,
උස් කරන, පහතට හෙලන අත දෙස නෙත් කොණින් බලන
ආභරණ වල දිස්නය සිරුරේ ගැටීමෙන් රූපයෙන් බබලන්නා වූ,
පිළිවෙලට අනුව නටන්නා වූ ලලනාවන් සැලෙන පහන් දැල්ල
වැනිය.
සැලළිහිණි සංදේශයේ සිත්ගත් කවි
රිවිබිම්බා යුරු රිවිකුල කමලකර
පියුමම්බා නිතොරව රැඳි උර මැදුර
මෙනරම්බා හිමි රූ සිරිනි මනහර
පැරකුම්බා නරනිඳු සඳ දකු මිතුර
සුර්ය වංශය නමැති නෙලුම් විලට හිරු මණ්ඩලය වැනි වූ ,
පපුව නමැති මන්දිරයෙහි ශ්‍රියා කාන්තාව නිතරම වෙසෙන්නා වූ ,
රම්බා නමැති දිව්‍යාංගනාව ගේ සැමියා මෙන් රූප ශ්‍රීයෙන් මනහර වූ
පරාක්‍රමභාහු රජු දැකගන්න මිතුර .
සැලළිහිණි සංදේශයේ සිත්ගත් කවි
සුරරද සමන් සමඟින් සුරඟන එවර
පැහනද මදාරා පරසතු මල් පතර
කරැ පුද වඳින රැඳි මුණි සිරි පා තඹර
සකිසඳ පෙනේ සමනොළ ගල නැගෙනහිර
සමන් දිව්‍යරාජයා සුරඟනන් සමඟින්, ප්‍රභාමත්
මදාරා හා පරසතු මල් පූජා කොට වඳින්නා වූ
බුදුරජානන් වහන්සේ ගේ නෙලුම් මලක්වන්
ශ්‍රී පාදය සටහන් වූ සමනොළ කන්ද
නැගෙනහිරින් පෙනේ.
සැලළිහිණි සංදේශයේ සිත්ගත් කවි
කස්තුරි තිලක සැදි නළලත සුමුටාන
පුල් මහනෙල් මල්දම් හිස දවටාන
සලෙළුන් යනෙන නිති කරැ කෙළි කවටාන
රිවි මුදුනත වදු වන මැද සුමුටාන
කදිමට මටසිළුටු වූ නළලෙහි කස්තුරි තිලකයන් තබාගෙන,
පිපුණු මහනෙල් මල් මාලා හිසවටා දවටා ගෙන, කෙළි
කවට කරමින් සල්ලාලයන් යන එන, වනාන්තරයක් මැද්දේ
තිබෙන්නා වූ සුමුටාන ග්‍රාමයට, හිරු මුදුන්වන වේලාවෙහි
සැපත් වන්න.
සටහන; වාසනාවට අද සුමුටානේ (හිඹුටානේ) හිසේ මල් ගසා
ගෙන රස්තියාදු ගසමින් සිටින තරුණයින් දක්නට නැත.
සැලළිහිණි සංදේශයේ සිත්ගත් කවි
තවර කර කොකුම් සඳුනෙන් තුනු සියල
පවර සුවඳ මල් දම් පැළඳ මනකල
බැහැර සිතු නොලූ හිමිනඹුවො කෙළිලොල
එපුර ඉඳිති සඳපානේ සඳලු වල
කොකුම් මිශ්‍ර සඳුන් මුළු සිරුර පුරාම තවර ගෙන, මන බඳිනා
සුවඳින් යුත් මල්මාලා පැළඳ ගෙන, අන් අය කෙරෙහි සිත්
නොයවා කෙළි දෙලෙහි යෙදෙන අඹු සැමියෝ ඒ නගරයෙහි
සඳ එළියෙන් ආලෝක වූ සඳළුතල වල සිටිති.
සැළලිහිණියේ සිත්ගත් කවි – පෙබරවාරි
ලොවැ විහිදා සුදු පැහැ සඳ රැසෙව් සැදී
දෙන නොමඳා සිරි සග මොක් සැප නිසැදී
ලද මුනිඳා දම් කඳ පහස මන බැඳී
වඳු දළදා හිමි තෙමහල් පහය රැඳී
රාත්‍රියේ චන්ද්‍රයා පායා එම සඳ රැසින් මුළු ලෝකයම සුදු පැහැයෙන් බබළ වන්නා සේ, ලෝකවාසීන්ට ස්වර්ග මෝක්‍ෂ සම්පත්තිය නිරන්තරයෙන් අත්කර දෙන්නට සමත්වන්නාවූත්, එමෙන්ම බුදුන්වහන්සේ දේශනා කළ සියලු ධර්මස්කන්ධයේම පහස ලැබුවා වුත් දන්ත ධාතූන් වහන්සේ තුන් මහල් ප්‍රාසාදය වෙත ගොස් මිතුර වැඳ පුදා ගනු මැනව.