මතක

වෛද්‍ය ශ්‍යාම කුමාර මුණසිංහ
වෛද්‍ය ශ්‍යාම කුමාර මුණසිංහ
2021-October

මව්කම අතැර නිවනට යන පාර වැද
අවුරුදු කීපයකි සීතල දුරුතු අද
බිවු රස කිරෙන් සවිමත් දූ පුතුන් හොඳ
මවු ගුණ ගයනු දෙව් ලොව සිට අහනවද

මහ ගෙයි අඩිය තියනා හැම වෙලාවෙම
සුවඳයි පිච්ච මල් ඒ මුළු පලාතම
අම්මගෙ අතින් පැළවුන මල් ගහේ හැම
මලකම රැඳී ඇත්තේ හදවතේ පෙම

සිය පණ විළස දරු කැළ රැකගත් බැවින
දරුවන මහා රුක් සේ උස් වී වැඩින
ඔබෙ පණ නිදන තැන යටි පස මත වැවෙන
මොන මොනවදෝ මල් ඇත හැමදා පිපෙන

හවසට පොරොවගෙන ලිප රස්නෙට එබුන
පස් යට සීතල ද අඳුරු ද ඔබ හිඳින
අම්මට තනි ද කවදත් පිරිසෙම රැඳුන
සදහට ළඟම වැතිරෙමි දවසක නිවුන