(අ)හිමි
2024-February
සිනා මල් විතරක්ම හිමි වුන
පෙම් කවක් සිත් තුලම ගොළු වුන
මතක සිත්තම් රුවට හැඩ වුන
මටත් තිබුනා පෙමක් රහසෙම
නිවාඩුව ගම් බලා දිව යන
පෙම්වතුන් හමුවෙලා සමුදෙන
අම්බලමෙ මඟ බලා උන් හැම
අතරෙ හෙව්වා ඔබේ ඇස් මම
කියා එවතැයි සිතැඟි දවසක
එන බවක් හමුවෙන්න හවසක
පාළු දේදුනු පාලමේ ඉම
බලා හිටියා ඇත්තමයි මම
මුහුනු පෙළ මැද ඔබ දකින හද
හඬා තිබුනත් මටත් රහසෙම
නොහිතු අසුරක ඇසුන ඔබෙ හඬ
සිතුම් මනමත් කලා දවසෙම
සිනා පිපි සරසවි වසන්තෙක
වචන නොලියුනු ප්‍රේම ගීයක
සරය නොවැයුනු මියුරු තනුවක
අසනු රිසි වූ ගී හඬයි ඔබ…..