ගුරු සිත

පියුමි ජයකලණි වික්‍රම ආරච්චි - ලන්ඩනය

2024-June

ශිෂ්‍යයෙක් : මම විභාගෙ කරන්නේ නෑ මිස්

කළල් කර නිස්සාර බිම් කඩ
මහත් වූ බැතිබර සිතින්
තැනූ රන් අස්වැන්න මිය යනු
දරනු ගොවි සිත කෙලෙසකින්

කඩ ඉමක් මග සිනාසෙන්නේ
නෙළා දෙනු රන් බිජු සොඳින්
වඩා ගනු මැන දෝතටම ගෙන
දුක් කඳන් මිරිකා තදින්

බිඳ හෙලා බාධක මැදින් ගඟ
කටු කොහොල් ගල් පරදමින්
ගලද්දී මනකල් ද කෙතරම්
නිසල ඟං දෑලට උඩින්

මාද මේ ලෙස පලා ගියෙ නම්
නියං කල මේ දිවි මගෙන්
අදට වැළලී බොහෝ කල් වෙයි
දරුවො මා උඹටත් කලින්

~ සකද මලයි බබළු වැලයි කාව්‍ය සංග්‍රහයෙන් ~