කළුවරත් එක්ක
2022-April
ගැටුණු තැනෙක පය පැකිළී බිඳෙන සුළු
පලිඟු පහන් ගබඩා කළ අඳුරු මුළු
ඇසට හොරා ඇස් ඉඳහිට කඳුළු සැලු
අවට කොතැන හෝ තවමත් තියෙන වලු
ඉරට එරෙහි කළුවර ගැන ලියු කවිය
ඔබට සුබපැතුම් වූ හැටි සඳ දෙවිය
පවට බණින විට හඬ ගා ගිනි අවිය
පිනට පිපුණු මල් කිසිවක් පර නොවිය
සොඳුරු අතක මුව සුසුමක සුව පහස
මියුරු කවක සර දැහැනක රස පහස
නුදුරු දිනෙක සිහිනෙක විඳගනු පිණිස
අඳුරු දවස නිමවාලනු මැන දිගැස
22.03.2022