කදිර දෙව් රද
2023-August
රණ මයුර වාහනේ නැඟගෙන
මැණික් නදියෙනුත් එතෙරව
කිරි වෙහෙරත් පැදකුණු කොට
අෂ්ට පල බෝධියත් වැඳගෙන
මූණු සය කඳ මත දරාගෙන
රුදුරු අවි අත් දොළසකින් ගෙන
දෙපයින් නා රජෙකු මැඬගෙන
කදිර සුරිඳුන්ය මා අබියස
තිගැස්සී ඇහැරුනෙමි නින්දෙන
උපශාන්ත මහල්ලෙකි දෙව් රද
සුදෝසුදු දිගු රැවුල පිරිමැද
ගැඹුරු හඬකින් කීය මෙලෙසින
ගැට පිට ගැට ගැසූ පඬුරින
වටේ පූජා වට්ටි ගොඩ මැද
මොණර රුව ඇති පඬුරු ගනිමින
කපුවන්ගෙ යාතිකා සද්දෙන
සරුව පිත්තල පබළු බබලන
තිරයකින් මගෙ අවට වසමින
අඳෝනා පමණක්ම අසමින
මේ දෙවොල තුළ හිඳිනු කෙලෙසින
යාල වන පෙත සියොත් නද දෙන
මුව ගෝන අලි ඇතුන් ගැවසෙන
මැණික් ගං තෙර නිසල නිවහන
“කැබැලිත්ත”ටම නිදහස්ව යමි මම.