අම්මා!!! ආචාර්ය ලක්ෂ්මි දමයන්ති
2024-January
දස මස කුසේ අදරින් රැක ගනිමින්න
නොවිඳින දුකක් විඳ මා මෙලොවට දුන්න
කුස ගිනි නිවා දෙතනේ කිරි පොවමින්න
අම්මා වඳිමි දෙපතුල ළඟ වැටෙමින්න
මතකයි කුසට අහරක් නැති වුවත් නුඹේ
මුට්ටියෙ ඉතිරි බත් රඳවනු අපේ මුවේ
බඩගිනි සඟවමින් හිනැහුනු නිමේෂයේ
උගුරෙන් පහල යන බත හිරවුණා මගේ
අවිහිංසක හිතට සැනසුම ගෙන දුන්න
හැම විට දියණියන් දෙදෙනා කරපින්න
උන් වැජඹෙන අයුරු රස කර කියමින්න
මහ ලොකු කතා ආඩම්බරයෙන් ඔන්න
අක්කා හොරු අරන් ගියාම අකල් යම
ඔය හිත හිර වුණා කඳුලක මහා බර
අදටත් හොරෙන් හැම රෑකම අඬන හඬ
මගෙ කඳුලුත් එක්ක මුසු වෙනවා නිබඳ
මොන දේ කලත් දුන්නත් මට නම් මදිය
නුඹෙ සිනහව රකිමි මගෙ මුලු දිවියෙන්ම
සසර නිවෙන තුරු මට අම්මා වෙන්න
තව දේ කරන්නත්, දෙන්නත් අදරින්න
බින්හැම්ටන්, නිව් යෝක්
8 දෙසැම්බර් 2023