පිය රජ

කෝ. ආනන්ද - පැරීසිය

2021-November

පීතු පාදං නමාමි
23.06.2020 පියවරුන් ගේ දිනය

යටිසිත උඩුසිතට රහසේම අරගෙන
හිටි හැටියේම දරු සුරතලය පුරමින
කැටි කරගත් සෙනෙහස හදට පෙරමින
දිටියෙමි පියාණෙනි රජ ඔටුණු දරමින

ගිය ගිය තැනෙක දරු පුරසාරම් දොඩන
සිය සිය නෑසියන් ඉදිරියෙ ආවඩන
දිය දද නගන සිහිනය හැබැහින් වඩන
පිය පියතුමනි මගෙ දිවියෙන් ඔබ දකින

පියාපත් පුදා පියඹන්න වරම් දුන්
කියා නෙක කතා සිප්හලට බාර දුන්
නියාමය අනුව මෑණියන් කළ මුදුන්
පියාණෙනි ඔබය මතු දවස මෙත් බුදුන්

(‘කොරෝනා කාලේ කවි’ සංග්‍රහයෙන් – පෙබරවාරි 2021)