(ප්‍රභූ ආරක්ෂක )විරුවා
2022-July
තුමා සමගින් ඇදෙන වේගෙන් වහන්වීගෙන හැංගිලා
ගෙවා පසුකර නගර හනිකේ තිබෙන පෝළිම් දික්වෙලා
මහා විපතක හෙලූයෙන් රට ජීවිතේ බර වැඩිවෙලා
ලෙහා ගනු බැරි අවුල් සිත මා නිල රථය තුළ තනිකලා
උයාගන්නට බැරිලු අම්මා දරත් වැස්සට අහුවෙලා
සොයාගන්නට නැහැ ප්‍රෙෂර් පෙති තාත්තා ඇති බයවෙලා
කපාගන්නට අරන් විදුලිය මල්ලිගෙත් වැඩ නැතිවෙලා
හිතාගන්නට බැරිම තරමට සියළුදේ පැනයක් වෙලා
සිටිනවා කුසගින්නෙ ජනයා මුන්ගෙ සැප නැහැ අඩුවෙලා
ගෙවනවා දිවි විනෝදෙන් දරු පවුල් සමගින් වැජඹිලා
තිබෙනවා නීතියත් පොලිසිය අයුක්තියටම යටවෙලා
සිතෙනවා මේ කාලකණ්නියො කුමට රකිමුද වෙහෙසිලා
එදා උතුරෙදි සුරැකි විලසින් ද්‍රෝහීන්ගෙන් ගලවලා
මෙදා මව්බිම වෙතට මෙහෙයක් කරව හදවත අණකලා
යොදා එල්ලය නලල මැද්දට නැගිටුවා අත සොලවලා
පුදා මුල්තැන රට රකිමි යැයි දුන් පොරොන්දුව ඉටුකළා