දුක නවතමු
2021-November
අකමැති වන නිසා සැම කෙනෙකුම දුකට
නිතරම වෙහෙස වෙයි ළංවෙන්නට සැපට
කෙතරම් වෙහෙසුනත් දුක උරුමයි අපට
නිසි සැපයක් නොවේ අම නිවනින් මෙපිට
නෙක වෙර දරා උපයාගත් දෙය අතට
අතහැර දමා යන්නට වෙයි අප සැමට
අරගෙන යන්නෙ මෙතනින් යන විට එවිට
ගත් දෙය පමණමයි ඔබ අපි සැම සිතට
රැස් කළ ධනය පමණක් නොව අප සැමට
සෙනෙහස පපා ආදර බස් කී සුමට
මව්පිය සහෝදර දූ දරු සිටි එකට
කිසිවෙක් නොඑයි අප සමඟින් පරලොවට
සිහි නුවණින් බලන අයකුට නිසි ලෙසට
වැටහෙන මේ සැබෑ තතු අරගෙන සිතට
සැම මොහොතකම සිත යොමු කරමින් පිනට
දවසින් දවස ළං වෙමු නිවනේ සැපට