ලන්ඩනයේ සිට මුදා හැරෙන ශ්‍රී ලාංකේය කවි සරණිය

ලන්ඩන් කවි සිව්වන වෙළුම

2021 අප්‍රේල් කලාපය

ඈත හිමයේ සැඟව සිට නලවලා හද උණුසුම් සුසුම් වසන්තයෙ විසිතුරට ලංවී සුවඳ විඳ විඳ නෙක කුසුම් දෙදෙන පසුපස එක වැලට එන කුඩා පැටවුන් හඬ ඇසුම් ඉටුවෙයිද සොඳුරියේ හිමයෙදි තුඩට තුඩ දී පැතු පැතුම්

අනුර ඡායාරූපය: මේනු හෑගොඩ

සංස්කාරක: අනුර හෑගොඩ Editor: Anura Hegoda
වෙබ් අඩවි නිර්මාණය: තරිඳු රාජකරුණා Web Admin: Tharindu Rajakarauna

හිමය වියැකෙමින් ලන්ඩනයට වසන්තය උදා වෙමින් පවතී. එහෙත් ලොක්ඩවුන් ක්‍රියාවලිය තවම අවසන්ව නැත. මිටින් හල කුරුල්ලන් සේ පියාඹා යන්නට කොතෙක් දෙනා අර අඳිනවා ඇද්ද?.ඒ පැතුම් එලෙසින්ම ඉටු වේවා!
මෙවර කලාපයට ජ්‍යෙෂ්ට කිවින් තිදෙනෙකු ඔවුන් ගේ අත් අකුරින් එවූ කවිය එලෙසින්ම පල කිරීම කළෙමු. ඒ එවැන්නන්ගේ අත් අකුරු කියවීමට ආසාවක් බොහෝ රසිකයන් තුල ඇති බව දන්නා නිසාය. ඒ රස විඳීම ද සිදුවේවා!
මෙහි පල වන 'ගුත්තිල කාව්‍යයේ සිත්ගත් කවි' සහ 'රත්නවල්ලි ගේ ගීතය' සඳහා අපූරු සිතුවම් ඇඳ දුන් එස්.එල්.සෙනෙහෙධීර විශිෂ්ටයාණන් හට අපගේ හද පිරි ප්‍රණාමය පිරි නමමු.

සක්මන් මළුවේ දි සෙට්වී බැඳි හාද -අනුර හෑගොඩ

තවත් මෙතනින්

සැමුවෙල් රුද්‍රිගෝ

2021 අප්‍රේල් කලාපය

විසල් හදක කවි - මොකටද මල් වඩම්

(පුවත්පතකින් උපුටා ගන්නා ලදී )

නොගිහින් කිසි දිනක කිසිවකු පසු පස්සේ
ජීවත් වුනෙමි දහසක් කරදර අස්සේ
මගෙ දුක බලා කව්රුද එළියට බැස්සේ
මොකටද මල් වඩම් මට මැරුණට පස්සේ

කුමටද ගුණ කතා සැරසිලි වැඩක් නැතී
හොඳටම වැඩි උනොත් සුදු කොඩි දෙකක් ඇතී
මැරුණට පසුව කිසි කෙනෙකුට බරක් නැතී
මිනිසකු මළා කීවොත් මට එයත් ඇතී

ජීවත් වෙලා සිටියදි මව් පියන් හට
කන්නට අඳින්නට කිසිවක් නොදුන් නට
මැරුණට පසුව නම් ඉහළින් පෙනෙන් නට
පින්කම් කරනවා දෙව් ලොව යවන් නට

පුළුවන් කාලයේ හොඳ හැටි කන්න හපා
කිසිවක් නොදුන් දරුවෙනි දරු කමද නොපා
පණ යන මොහොතෙ බොරුවට ආදරය පපා
හිරවී මැරෙයි මොකවත් ගිල්ලන්න එපා

කවදා නමුත් දවසක මිය ඇදුන විට
නැති ගුණ ගයා රොක් වී ගෙන ගේ තුලට
මගෙ දරු පිරිස බොරුවට වත් අඬන විට
නැගිටිමි පෙට්ටියෙන් පුළුවන් උණොත් මට

View Poem

2021 අප්‍රේල් කලාපය

Now

I am not an English poet
I am a collective poet
You are a real poet
We are writing poems now

Before we need everything
Now we need life
Why before and now
There is no before and now

Only need few in life
Oxygen water food
And few bits and bobs
Remember before and now ?

If you sent love
You will receive love
Do not cry now
Oh no one calling me now

There is no war now
Also no suicide now
Do you know why now
We all fight same war now.

View Poem

කෝ ආනන්ද පැරීසිය

2021 අප්‍රේල් කලාපය

මල් පිරිලා ඇති රතුවට එරබදු අතු අතර
කජු පුහුලන් පිරිලා ඇති අතු බිඳෙන්න විතර
මී අඹ පිරි ගහ මුදුනේ ඉඳන් මිතුරෙ නිතර
කොහෝ කොහෝ හඬ දීපන් සැරින් නොකර නතර

හිරු කුමරුට මුකවාඩම් වාරණ දෙත හැකිද
ඔහුගෙ ගමන නවත්වන්න නීති රීති ඇතිද
බක්මාසේ ළඟ එනවා ලොව වහගෙන නිදිද
අවුරුද්දට ගෙදර යන්න කොහෝ මගක් ඇතිද

ගුමු ගුමු ගා මීමැස්සන් හාදු දිදී රඟනා
පිපිලද මල් ගම පුරාම මිහිරි සුවඳ හමනා
පසුවෙන්නේ කාලයක්‍ය ලොවම දුකින් ගෙවනා
කිරි උතුරමු කොහෝ සුබයි නව අවුරුද ලබනා

තෑගි අරන් දෙමාපියන් බලන්න ගම යන්න
සහෝදරයො නෑයො එක්ක සතුට බෙදා ගන්න
රෝග ඇවිත් ගෙනා විපත් අමතක කරලන්න
කොහෝ නුඹට හැකිද මාව ගමට අරන් යන්න

කැවුම් කොකිස් මුං අලුවා කැවිලි රසට හැදෙනා
රබන් ගසා විනෝදවෙන වෙන මගුලක් නොවෙනා
දොළොස් මහක් දුක් විඳිද්දි එකම සතුට තිබෙනා
මට අවුරුදු ඕනා කියන් කොහෝ හඬින් ඇහෙනා

View Poem

2021 අප්‍රේල් කලාපය

පන්සලේ හාමුදුරුවන් ගේ අලියා
පැටියා කාලේ දායකයෙක්
අමතක කරලා ගිය නිසා
කන්න දීලා හදාගත්තා

පන්සල් වත්තේ අලියා බැඳලා
කකුල් හතර කිටි කිටියේ
හැරෙන්නවත් බෑ
හොඞය වනනවා

යකඩ දම්වැලට
කකුල තුවාල වෙලා
දම් පාටින් බේතක් ගාලා
තුවාල වල මැස්සෝ පිරිලා

ලොකු හාමුදුරුවොත්
ලොකු හාමු කෙනෙක් වෙලා
අලි ඇත්තු තමන් සන්තක කරගෙන
මහ රාජා කෙනෙක් වගේ

ගමන් බිමන් යන්නෙත් පත වාහනයක
නිතරම සෙල් එක කනේ
ඉන්නේ දේශපාලකයෝ පිරිවරාගෙන
පිරිවර සමග සසරින් එතර වෙන්න

අපට නම් කිව්වේ උන්නාන්සේ
සියල්ල අත් අරින්න කියලයි
කුසල් සිතින් අපි අත් ඇරියම
උන්නාන්සේ ඒවා තදින් බදාගත්තා

චිරාගත සංස්කෘතිය රකින්න ඕන නිසා
අලි පැටියෙක් කැලයෙන් අල්ලන් එන්න
කියලා උන්නාන්සේ අලි රොෂාන්ට කිව්වේ
ඇසෙන නෑසෙන ගානට

මිසදුටුවෝ - බෞද්ධ විරෝධීන්
එන්.ජී.ඕ කාරයෝ
බොරු සත්ව කරුණාව ඇත්තෝ
හමුදුරුවන්ව විවේචනය කරනවා

කැලේ ඉන්න අලි අල්ලගෙන
උන්ව දම්වැල් වලින් බැඳලා
කුම්බස්තලයට හෙණ්ඩුවෙන් ඇනලා
දසවද දෙනවා කියනවා

උන් අහනවා මේවා බෞද්ධ වැඩද
බුදුන් වහන්සේ දේශනා කලේ මේවද
අරකද මේකද කියලා
හාමුදුරුවන් ගෙන්

හාමුදුරුවන් නම් කියන්නේ
අලි කියන්නේ බෝසත්තු
උන් අපේ සංස්කෘතිය එක්ක බැඳිලා හිටියා
බෝසත් ඇතා පිට උඩ තමයි ධාතු කරඞුව වඩම්මන්නේ

මිසදුටුවෝ - බෞද්ධ විරෝධීන්
එන්.ජී.ඕ කාරයෝ -බොරු සත්ව කරුණාව ඇත්තෝ
උන් කියන විදියට ධාතු කරඞුව වඩම්මන්නේ
මහ ඇමතිගේ ඩිෆෙන්ඩරයේද ?

මේවා මහ මෝඩ කතා
පන්සල් වල අලි එදත් හිටියා
අදත් ඉන්නවා
හෙටත් ඉන්නවා

උන්ව හැමදාම දම්වැල් වලින් බැඳලා
හෙණ්ඩුවෙන් ඇනලා
මෙල්ල කරලා තමයි
ලොකු හාමුදුරුවන් ලඟ වන්දවන්නේ

පන්සලේ අලියෙක් ඉන්න එක
කොච්චර නම්බුද
මැති ඇමතිවරු අටපිරිකර අරගෙන එනකොට
පේන්න ගැට ගහල ඉන්නේ ආවාසේ ඉස්සරහම

අලියා කියන්නේ සංකේතයක්
අපේ අනන්‍යතාවයක්
සංස්කෘතික නිමිත්තක්
ඒ නිසා ඌ සතෙක් නෙවෙයි
වෙන මොකක්ද එකක්

View Poem

තලන්ගම ජයසිංහ

වසන්තේ නිදාවුන් කොවුලා කියා
මගේ අතේ තරු අකුරින් ලියා
යලි නොඑන බව කොඳුරා කියා
හමුවූ දිනම සමුගෙන ගියා

මගේ මුහුණු පොත පෙරලා බලා
මගේ කවි ගීත දැක වී මං මුලා
හමුවන්න ආ මුත් පුලපුලා
හමුවූ දිනම සමුගෙන ගියා

අවුල්වූ නර කෙහෙ බලා
ලය සුසුම් පොද මුව ලඟ හෙලා
නාදුනන සුවදක් තියා
බාල බාලොලිය නොපෙනී ගියා

View Poem

2021 අප්‍රේල් කලාපය

හෙවනැල්ල

අලුයම සවස බඹ අට දහය දිග ඇදී.
කුලුපග ලෙස දවල් විත් දෙපය මත වදී.
කලුවර වැටෙන මොහොතේ රැගෙන හොර නිදී.
මුලු දිවියෙහිම ඔබ මා සමග ලඟ හිඳී.

සිටගෙන සිටින විට ගොස් ගල් තලය වෙත .
යට බෑවුමට පැන වල් කටු පඳුරු මත.
සටහන් තබනු සවසට දැක පුරුදු ඇත.
මට ඔබ තරම් මේ ලොව හිතවතෙකු නැත.

රටුනට වැඩක් පැවරූ විට අසල සිටී.
ඉටු කළ පසුව දිය යුතු පුද පඬුරු තැටී.
දුටුවෙමි එහෙත් යන එන හැම තැනම වැටී.
වැටුපක් නැතුව මා ලඟ තනි රකින හැටි.

අඹ තුර දිනිඳු රජ වැජඹෙන සියළු පැයේ.
බබලන එලිය අතහැර කිසි තැනක නොයේ.
සුභ නැති නිසා සැඟවෙනු ඇයි අඳුරු රැයේ.
ඔබ කොයි ගියෙද අඳුරට මේ තරම බියේ.

කුඩා කලදි සටහන දැක පහන කෙරෙන්.
විඩා රැගෙන අත වැනුමට ඔබට හොරෙන්.
දොඩා නොකරවයි මා කල දෙයම සැරෙන්.
අඬා හුනිමි බැට දී බිත්තියට වැරෙන්.

ගෙතුලෙහි පහන් දල්වනු දැක අඳුර බිඳී.
මතු වී පසෙක පසු වෙයි බිත්තියට ඇදී.
ඇතුලට සුලඟ ආවොත් කවුලුවෙහි වැදී.
බිතුවෙහි නටයි ඔබ මට මඳ සිනහ දිදී.

ජීවන ගුණය ඔබ අතහැර ඉවත නොයයි.
රෑ වෙන විටදි මා වාගෙම එලිය සොයයි.
මා ගෙන පෑන කවි ලීවොත් ඔබ ද ලියයි.
නෑසෙන බසින් ලඟ ඉඳ කවි පෙලම කියයි.

දිසි වන මගේ හැඩ නිල අඩු නැතුව පිරී.
නිසි ලෙස කරයි මා කල දේ කොහොම හරී.
කිසි විට එහෙත් සිටියදි ඉදිරියට හැරී.
ඇසිපිය සලන්නට මා මෙන් ඔබට බැරී.

විපතෙහි අතුරුදන් වන නෑ මිත් ගොල්ල.
සැප දැක ඇදෙති උදුරන්නට සැනසිල්ල.
එපවත් එසේ වුව ගෙඩියට ලෙස ලෙල්ල.
උපතේ සිට ලදිමි නොවෙනස් හෙවනැල්ල.

View Poem

ප්‍රීති රන්දෙණිය

2021 අප්‍රේල් කලාපය

ඇහලෙ පොල වැලපුම

View Poem

දයා ආනන්ද රණසිංහ එක්සත් රාජධානිය

2021 අප්‍රේල් කලාපය

සිංහළ අවුරුදු සිහින

අළුත් අවුරුදු කුමරු වඩින සඳ පෙර ගිරේ
මලානික වන වදුලු සිනා පැහැයෙන් පිරේ
ඈත් වී හිතවතුන්, දෙමාපිය, සනු හරේ
සුසුම් පසුතැවිලි මිස කුමක් වෙද බට හිරේ

දොළොස් මස් ගෙවී එන සිරියාව බක් මහේ
ගව් ගණන් දුර නමුදු සිතින් සඟවනු නොහේ
ගෙදර කල එළි වෙවී ඉදෙයි රඹ කැන් ගහේ
එවන් සිරි යළිත් මා දකිනු කවදා කොහේ

නැකැත් සැණ එන තුරා වෙලා බල බල ඉන්න
අළුත් ඇඳුමෙන් සැදී පහන් වැටි දල් වන්න
රතිඥඥා හඬ අසා උදෑසන පිබි දෙන්න
අනේ ආසයි මටත් යළිත් ගම රට යන්න

බැඳේ ඔන්චිලි ගසේ නැගුණු සඳ ගුවන් යන
මිදේ කිරි ඇතිළියෙහි දකින සිත් පහන් වන
සැදේ අතිරස කැවුම් සුවඳ නොයිවසුම් වන
බිඳේ දොම්නස මැදින් රබන් හඬ ගිගුම් දෙන

වැටේ එරමුදු ගසේ හැඩට රතු මල් පිපෙන
ගමේ කජු ගස් මුදුන කොහා පිළිරැව් නගන
කැවුම් කිරිබත් සුවඳ රබන් පද පිරි වැරුණ
දැනේවා පෙනේවා මටත් අවුරුදු සිහින !

View Poem

අතුල රත්නායක ලන්ඩනය

2021 අප්‍රේල් කලාපය

කුඩා දැරියක් උදේ …… පොලීසියෙ අඬනවා
මවකගේ විලාපය ……. අතර ඇය කියනවා

මගේ කිරි කැටි පැංචි …… මම ගෙදර නැති වෙලේ
ජිනේ දූශනය කර ……….. පැන ගිහිං දෙයියනේ

මේ දැරිය නේද අර ………… රියැලිටියෙ සිංදු කිව්
කොට ගවුම ඇඳ හැඩට ….. වේදිකාවේ නැටූව

“ඔබෙ දෙතොල් සිපගන්න … ඔබේ වත දැකගන්න”
ගැයූ ගී පදවැල් ……………. මවක තෝරලා දුන්

විනිසුරු මඬුල කිවි …... ….. හරි හැඩයි ගායනය
සිත් පිනයි ඇගෙ නැටුම…… උචිත ගීතය සමග

නීතියේ ඇත්නම් ඉඩක් ….. ගන්නවා එක පෙලට
අරිනවා දඟ ගෙයට……...නැගනියේ නුඹ ඇතුලු
විනිසුරු මඩුල්ලත්

View Poem

2021 අප්‍රේල් කලාපය

ගැටුමට අලි-මිනිස් අලියන් වෙද නිවට?

විඳිමින් තුරුලතා ලැබ දෙන සිත සතුටක්
විලසින් ගලා ඇදෙනා සේ දිය දහරක්
ගනවන් ඇතුන් පෙළහැර වඩිනව ගමනක්
බුහුමන් පුදයි මග රැඳි සැම වන දිවියක්

සිහිල් වගුරන වන උයන් මැද මනාසේ
නිමල් සිත් පිරි දේවතාවන් විලාසේ
විසල් කළු සෙල් පෙළක් පෙරළේ ජලාසේ
ලකල් සිරි විඳ වනන්තරයක් සිනාසේ

වන රොද අරක්ගෙන සිටියට සිත් සතොසේ
පන රැක ගන්න හැකිවෙද වියැලු‍ණු පියසේ
වන පෙත් මාරු වෙන්නට එකලට රහසේ
දැන මග ගමන යති අලි මංකඩ පහසේ

සලා දෙකන් පෙති දුර දිග අසමින්නේ
හෙළා නෙතග අවිහිංසක කැල්මෙන්නේ
වෙළා රෑන එකිනෙක ඇඟ හැපමින්නේ
කළා වකට අලිමංකඩ පියමැන්නේ

මිනිසා මිහිතලය තනි උරුමයට ගෙන
වනසා තුරුලතා අහුරා අලි ගමන
සරසා සිමෙන්තිය අහුරා හෙලු‍ විමන
කෙළසා දමා අලි යන මග කටියි වින

ඉන්නට හැකිවේද කුසගිනි ඇති කඳට
යන්නට තැන් වේද යන මං නැති කලට
කන්නට කුසට සිඟමන් යති ගෙයින් ගෙට
ගැටුමට අලි-මිනිස් අලියන් වෙ ද නිවට

පැහැ සරණිය රැඳි සිරිලක වැඩි මුනිඳු
ගෙල කිකිණිය හඬවයි පෙරහැර ගිජිඳු
සිත වෙනතය වෙන දේ දකිමින් සුරිඳු
සැළලිහිණිය එනු දකිනට දුක ගිජිඳු

View Poem

එස් එල් සෙනෙහෙධීර ලෙච්වර්ත් - එක්සත් රාජධානිය

2021 අප්‍රේල් කලාපය

ඉතින් අවුරුදු සමරමුද කෙලෙසින් ?

වඩියි හිරුදෙවි නුහුරු ගමනක සොවින් පිරි දෙනෙතින්
ඇසෙයි ඉකිබිඳ හඬනු කොවුලන් රිදවමින් දෙසවන්
මැවෙයි ගිණිමල් නැගුණු'යුරු දෙව් මැදුරු පියසි මතින්
හඬයි හදවත, ඉතින් අවුරුදු සමරමුද කෙලෙසින් ?

දරාගෙන දුක දෑත පා මම මගේ දෙවිඳුන් යදින අතරේ
මරා මා නුඹ නුඹේ දෙවියන් පුදනු ඇදහිය නොහැක මිතුරේ
කුරා කුහුඹුවෙකුටත් වරදක් නොකළ සියයක් දනන් අතරේ
මරාගෙන මියැදෙන්න තරමට කළේ අකුසල් කිමද සසරේ ?

බිඳී විසිරුණු දෙව්රුවේ ලේ කඳුළු පිසදා සෙනෙහසින්
සිඳී අත්පා දිවිය සුරැකුණු ගිලන් දන නිති සනසමින්
හිඳී නම් ලෝසතට මෙත පා එකම මනුලොව සුරකිමින්
වඳී දෙවියොත් අපට මෙහිවිත් ලැගුම් ඉල්ලා මනු ලොවින්

View Poem

2021 අප්‍රේල් කලාපය

ඔබ ලියු කවි වලට කවදත් පෙම් බැන්දා
අරුතක් සමග මිහිරක් නිරතුරු වින්දා
දුක සැප ලඟදි හැමදා ළඟ සිටි හින්දා
නුඹ නැති සොවින් මගෙ හදවත ඉකිබින්දා

අමතක මතක සිහිවී හදවතට වද
සැනසුම දුන්නෙ ඔබ හා නෙතු කඳුළු බිඳ
සොහොයුරු පෙමින් අප තුල ඇති සෙනෙහෙ කඳ
දියකළ හැකිද පවසනු මට මගේ හද

View Poem

2021 අප්‍රේල් කලාපය

කොහොමද කොහොමද

දළඹුවෙක් කොහොමද - සමනලයෙක් වෙන්නේ අයියන්ඩී
වන මලක් කොහොමද - මල් ගහකින් එන්නේ අයියන්ඩී
උල්පතක් කොහොමද - සැඩ පහරක් වෙන්නේ අයියන්ඩී
හිතින් ඔබ කොහොමද - මට ලංවී ඉන්නේ අයියන්ඩී

කවි හිතක් කොහොමද - පෙම් කවියක් වෙන්නේ පුංචි නගෝ
පෙම් කවක් කොහොමද - ආදරයක් වෙන්නේ පුංචි නගෝ
පැල්පතක් කොහොමද ආදරයෙන් - රජ මැදුරක් වෙන්නේ පුංචි නගෝ
තව ටිකක් ඉවසන්නෙ කොහොමද - කැන්දන් යනකං මගෙ පුංච් නගෝ

View Poem