කෙවිලියගේ රහස
2021-April
හිරු කුමරුන් ගම වඩිනා බක් මාසේ
එරබදු සිනාසී පෙර මග සැරසෙන්නේ
කොවුලන් ගයන ගී මිහිරෙන් ඇහැරෙන්නේ
ගම්මානෙටම කිරි බත ගෙයි ඉතිරෙන්නේ
කැවුම් කොකිස් සුවඳ හමා මුලුතැන් ගෙය පිරෙන්නේ
දෙමාපියන් හට වැඳලයි කිරිබත් කට ගාන්නේ
මවු පිය දු දරු බැඳීම සැම සිත ගත පිරෙන්නේ
එවන් ගමක අටු කොටුවල දන ධාන්‍ය රැඳෙන්නේ
එදා වගේ ගම්මානේ සවුසිරි නෑ පෙනෙන්නේ
විහඟුන් හට නැහැ පලතුරු ගස්වැල් වල ඉදෙන්නේ
රැහැයියන්ගෙ ගී නාදය තාමත් නැහැ ඇසෙන්නේ
කෙවිලිය රහසින් මේ ගැන කොවුලාගෙන් අසන්නේ
සිරිත් විරිත් ගමේ රැකුන දෙමාපියන් වෙසෙන්නේ
අද වැඩිහිටි නිවාසයේ කදුලින් නිදි වරන්නේ
අවුරුද්දෙම එක දවසයි මවු පිය ගුණ දැනෙන්නේ
එතුම් ගුණය නොදත් ගමක නෑ සවුසිරි රැඳෙන්නේ