නුඹයි ලක් අම්මාට ජනිත වුනු හොරණෑව
කොටහේනෙ වත්තක වීදියක ගෙපැලක
තාත්තාගෙ කබායක ඇති වටින බොත්තමක
ගුණ කියා නාද කර නුඹ සෙවූ රුපියලක
සැගවිලා තිබෙන් ඇති කටුක බව අතීතෙක
මාගරට් ටීචර්ට පින් සිද්ද වෙන්නට
බොර දියක සුදු නෙළුම මතු වුනා ලෝකෙට
සදුන් ගස සේ බුදු සමිදු ලග සෙවනට
සමන් මල වී නුඹ පිපුනි ලංකාවට
ගලන ගඟකියි කියා ජීවිතේ දිගු ගමන
අමරදේවයන් ගෙන් මග හසර ඉගෙන ගෙන
නොයෙක් බාධක මැදින් නොනැවතී දිරිය ගෙන
මහවැලිය පරදීවි නුඹ දියත් කල ගමන
මැණික් ගල් අදුරේ වුව වුනත් දිලිසේ
රිදී සීනුවක හඩ පැතිරෙනා විලසේ
සත්‍යයේ ගීතයට අරුත දී නිසි සේ
පවනක් වුනා ලොවක් අදුරෙන් මුදා සුවසේ
පිරුණු කලයේ දිය නොසෙල්වෙන අපූරුව
කියා දුන්න නුඹේ චාම් බව සරල බව
හෙල බසම පීරලා සම නොවන උපමාව
නුඹයි ලක් අම්මාට ජනිත වුනු හොරණෑව
ජාතියක් අවදි කල නුඹේ පින්බර හඩට
පෙම් බදිමි හැමදාම පින් දෙමින් දෙසවනට
දිගාසිරි පතමි තව බෝ කලක් දිලෙන්නට
නන්දා මාලිනිය මහ මෙරක් වගේ මට