Category: සුභාෂිතයේ සිත් ගත් කවි
සුභාෂිතයේ සිත්ගත් කවි
නුවණෑත්තවුන් පහකොට දුදනන් සෙවුන
නොමගත් සිත තුළෙහි ගුණ පොකුරඹ ලෙසින
මැදහත් නොව මසුරු ගුණයෙන් දවසරින
රජුටත් එරටටත් අතුරක් නැත වෙතින
ඥානවන්තයින් ඉවත් කර අසත් පුරුෂයන් ඇසුරු කිරීම
නෙලුම් කොළයෙහි ජලය නොරදන්නාක් මෙන් සිතෙහි
ගුණ රැඳීමක් නොමැති වීමත්, මධ්‍යස්ථ බව නැතිව මසුරු
ගුණයෙන් කල් ගෙවන රජුටත් රටටත් ඔහුම මිස වෙන
අන්තරායක් නැත.
සුභාෂිතයේ සිත්ගත් කවි
තමන් හට නොසමයන් වන කලට සම
මුවින් නොබැණ ඉවසනු සුදන ගරු කම
නොමින් කුමුදු විකසිත වනු දැක දැකම
විළින් මෙන් තඹුරු මුකුලිත වේය හැම
තමන් හා සමාන නොවන්නන් සමාන බවට
පත්වන කල කතා නොමැතිව සිටීම සත්පුරුෂයාගේ
ගෞරවයට හේතු වේ. ප්‍රමාණයක් නොමැති කුමුදු
පිපෙනවා බලා නෙලුම් ලැජ්ජාවෙන් හැකිලෙයි.
සුභාෂිතයේ සිත්ගත් කවි
බුදුන් දහම් සඟනට නොකෙළෙද අදර
නිවන් දකින පිනකුත් නොකෙළෙද පවර
ලියන තන නොසිපියෙද සිහිනෙන් විතර
උපන් මව යොවුන් වනයට පොරෝ යුර
යමෙක් බුද්ධ,ධම්ම, සංඝ යන තෙරුවනට ආදරය නොකළේ ද,
නිවන් දක්නා උතුම් පිනකුත් නොකළේ ද , ස්ත්‍රීන්ගේ පයෝදර
සිහිනෙන්වත් සිප නොගත්තේ ද එවැනි තැනැත්තා මවගේ
තරුණකම නමැති වනය විනාශ කර දැමූ පොරොවක් වැන්න
සුභාෂිතයේ සිත්ගත් කවි – අප්‍රේල්
පරසිඳු පබු දනන් සෙව් පමණින් මහරූ
බෙලෙනිඳු මඳ වුවත් නොකරති රුපුන් සරූ
බරනිඳු ගෙල වෙසෙන නා රද වෙමින් ගරූ
ගුරුළිඳු අතින් ඇසි කිම යහළු තොරතුරු
ප්‍රසිද්ධ ප්‍රභූ ජනයා ඇසුරු කල තරමින් දුබලයෝ
තම සතුරන් ගණන් නොගනිති. ඒ කෙසේද යත්
ඊශ්වරයාගේ බෙල්ලෙහි සිටින නාග රාජයා තම
සතුරු ගුරුලා වෙතින් දුක සැප කෙසේදැයි ඇසූ
අයුරිනි.
සටහන: තනිව සිටිය දී නයා ගුරුලාට අසුවුනහොත් කෑල්ලක්වත් ඉතුරු වන්නේ නැත. සුභාෂිතය ලියූ සීතාවක යුගයේත් අදත් වැඩි වෙනසක් නැත.
සුභාෂිතයේ සිත් ගත් කවි
කලුන් මැද්ද සබ අබතුර බොහොසෙ නිති
ලෙසින් විදුලි දිලි කග පත් ලෙළ කෙරෙති
කගින් කග පහර වැද නැඟි පුලිඟු ඇති
සටන් බිම’සි ගත් සෙබළෝ දුලබ වෙති
කාන්තාවන් අතරේදී ද සභා තුල ද නිතරම බොහෝ සේ
විදුලිය මෙන් දිලිසෙන කඩුපත් ළෙල දෙවති. එහෙත්
කඩුවෙන් කඩුව ගැටී නැඟුණු ගිනි පුපුරු ඇති යුධ පිටියේ
කඩු ගත් යුද බටයෝ දුර්ලභ වෙති.