පොඩි සාදු
2023-July
කවුරු හිටියත් හිතේ තනියක්
පන්සලේ මට දැනෙනවා
ගෙදර අය මට මතක් වෙනකොට
කඳුළු සිවුරෙන් පිහිනවා
මාසෙකට දවසක් දෙකක් හරි
ගෙදර එන්නට හිතෙනවා
ගියොත් සිල් ඇවැත් වෙයි
ගුරුනමක් මට කියනවා
උළු වහපු ආවාසෙ ඇතුළේ
තෙමෙන් නැතුවම නිදනවා
දෑස වැසුණම පිදුරු සෙවි කළ
පරණ වහලය පෙනෙනවා
කුසේ ගින්දර දැන් දැනෙන් නෑ
දානේ හැමදා ලැබෙනවා
හිතේ ගින්දර තාම එහෙමයි
ගෙදර බඩගිනි දැනෙනවා
ඉස්කෝලෙ නැති කාලෙ ඉවරයි
පිරිවෙනට දැන් වඩිනවා
අනිත් දෙන්නත් යවමු පාසල්
මගේ පොත් මං එවනවා
තාත්තගෙ අසනීපෙ හොඳ වෙයි
හැමදාම පිං පුරනවා
මට කියන්නට සුදුසු බෙහෙතක්
බණ අස්සේ මං හොයනවා
කිසි දුකක් නැති සොඳුරු නිවනක්
සසර අවසන තියෙනවා
අපේ අකුසල් ගොඩක් ලොකු ඇති
සංසාරෙ සැරි සරනවා
(කවි පොතක් අස්සේ ලියුමක් කාව්‍ය සංග්‍රහයෙනි – 2023)