ගගන සැලෙන ඔසරි පවන
2023-December
සඳ කිරණ ගලන රෑ රුක් වදුළු සැළෙන සේ
දොළ ගලන මිහිරි හඬ මැවී ඔබ ගගනතේ
ඔරුව පැද යන දියේ හබල බිඳි ප්‍රේමයේ
හද සලන භාවයක සර රැඳේ වා තලේ
පංසළක දවුල් හඬ දෙවොල් දොර ගීත රස
සවන් පිනනා ලෙසින් ජන හදට මුසු කලේ
පැලක කුසගිණි ඇවිල අකුරු කරනට නැතිව
හඬන දරුවන් සුසුම මුදාලී සවනතේ
කැණි මඬල බිඳ වැටුන පාලු යහනක තැවෙන
මවක නෙත කඳුළු බිඳු අඹර සර පා කලේ
දිළිඳු දරු සුසුම් මැද තැලෙන පීඩිත දනට
සිසිල් පැන් පොද වැස්ස ගී මලක මුසු කලේ
නෙලූ පිලිමය ගලේ හෙලූ බැල්මක සවිය
සවන පතුලේ රැඳේ ඔබේ ගී මල් විලේ
වීණාව බට ලීය ගජනාව ලක් බිමේ
සර්පිණා දවුල් බෙර ගිටාරය හඬ ඔබේ
රජ අණක විලංගුව කඩුව ගිණි අවි බැම්ම
කුඩු කරන රතු මලින් සැරසි ඔබ වා තලේ
වසන්තය මල් පිපෙන සුවඳ සිව් දෙස ගලයි
ඔබෙ සුවඳ ගෙන සරයි සහස් දන මිහි තලේ