ඇට්ලස් ලා……..
” ඇට්ලස් කියන්නෙ
කවුද තාත්ති ? ”
විමසයි පොඩි පුතු
පැන ඔඩොක්කුවට
මේ මුලු ලෝකයම
දරාගෙන උර මත
හිඳින යෝධයා ඔහුයි
පිළිවදන් දෙමි පුතුට
” පුතාගෙ තාත්තිත් ඉතින්
යෝධයෙක් තමයි
උස්සන් ඉන්න ගෙදරම බර ”
පුම්බා ළය
උරහිස් පලල් කොට
ආයාසයෙන් මවාගමි
යෝධ වෙසක්
මොහොතකට
ම’පුතු අබියස
විස්මයෙන්
විවර වෙයි
සිඟිති මුව
ඇසෙයි මුලුතැන්ගෙයින්
මෘදු නෝක්කඩු ස්වරයක්
විඩාබර
” බෙහෙත් ටිකවත්
බොන්නෙ නෑනෙ ඔයා
මං මතක් නොකලොත්
වෙලාවට ! “