ගයන විට මියුරුගී රැහැයි කැළ ගංගොඩේ
තිත්තයින් ඒ නදට දඟකරයි වක්කඩේ
නිවාගෙන කුසගින්න හූරමින් දංකුඩේ
පැලෙහි නුඹ තනියෙන්ද ලඟම අලි මංකඩේ

නා කැපෙන කළුවරේ නෙත සොයන සඳවතිය
පෑ සිනා මතකයට නැගෙන කල හද කිතිය
රෑ හඳට පෙම් බැඳන් සඟවගත් මුදු රතිය
වෑහෙනා හැඟුම් සිත තෙරපුමත් මට ඇතිය

සඳ නැගෙන විට අඹරෙ මගේ රුව මවාන
කොඳ මළක් නැහැ පුඩුවෙ දැවටෙන්න තියාන
පිබිදෙනා හැඟුම් මැඩ මත් දෑස පියාන
වඩින තුරු මම පැලට හිඳින් නෙත් අයාන