ධනය ..........
සැම උමතුවෙන් බව
බණ පොතෙත් ඇත
පමණ අඩු වැඩි පමණි
රාග ද්වේෂ මෝහ
පාට වෙනසක් පමණි
ධනය
වෛවර්ණ
උන්මාදයේ අග්ර ඵලයයි
එය වැඩෙන විට
වැඩෙයි මානය
නොකළ හැකි දෙයක් නැත
ඇස් දිස්ටි මානෙක
කවුරු එරෙහි ව ආවත්
දණ ගැස්විය හැකි ය
දණ නවනු බැරි නම්
කම්බස් කළ හැකි ය
වන චාර නීතිය බලය විය
සදාවාර නීතිය ධනය ය
බලය නීතිය ටික ටික
තැන තැන තිබුණත්
ධනයට නීතිය නැමිය හැකි ය
විශාරද නීති කප්පිතන්
මිළටගෙන
ඕනෑම නීතියක් නැවිය හැකිය
ඇත්ත නැත්ත කළ හැකිය
සැබෑ ම වරද නම්
උන් කොහේ යන්නේ දැයි
උන් නොදැන සීටීමය
උන්ට හිතෙන්නේ නැති කමය
උන් හිතන්නේ
සියල්ල සමතලා කර
ගමන යන බවය
මූඳුනට නඟින බව ය
දැනුම ඇතිකම
සහ
එයට සහතික ඇති කම
ධනයට අභියෝගයකි
එවිට සහතික මිළට ගනු ඇත
නැතිනම් මිළ ගෙවා
සිංහයන්
නරින්
පූස් පැටවුන් කරනු ඇත
උන්
සුළැඟිල්ල එසවෙන විට
එහෙයි කියනු ඇත .
මෙහැම තාවකාලික බව
නිසරු බව දුටුවේ ද
විනිවිද දක්නේ ද
චින්තකයින් ය
උන්ගේ සිතුම්
පොත් පිටු අතර සඟවා පොත්ගුල්
රාක්කවල සඟවා ඇත්තේ
කාටවත් ඇස නොගැසෙන්න වාගේ ය
මන්ද ඒවා දකින තරමට
මෝහය තුනීවන හෙයිනි
එයින් රාගය පෙරටු කළ
තණ්හා සමඟ
ද්වෙෂ ය හීන වන හෙයිනි
අප දකින ලෝකය දුවන්නේ
මෝහ තණ්හා රාග ද්වෙෂයෙනි
ඉන්නට
ඩයෝජිනිස් බැරලයක්
තෝරා ගන්න විට
ඇලෙක්සැන්ඩර්
අධිරාජ්යයක් ගොඩ නැඟුවේ
එබැවිනි
එහෙත් එය කෙරම්
නිසරුද
ඔහුට දෙතිස් විය
ඉක්මවිය නොහැකි විය
දෙදෙනා ම
ඉතිහාසය නම්
පොතක
සඟවා ඇත
ඕනෑ කමින් සෙවුවොත්
හමුවනු ඇත
එහෙම ඕනෑ කමක්
අප දකින ලෝකෙට නම් ඇත්තේ ම නැත
ලෝකයට ඕනෑ
දේවල් රැස් කරන්නය
බැංකු ගිණුම් තර කරන්නය
හඳත් අල්ලන්න ය
බිම සිට උඩ බලන උන්ට
පෙනෙන්නට
ඒකත් උලා කන්න ය
ඒකට කියන්නෙ
ලෝක ආර්ථිකය
ජය ගැනීම කියාය
ලෝක ආධිපත්ය ය
ජය ගැනීම කියාය
වෙන්නේ ඇලෙක්සැන්ඩර්ට
වුණ දේමය
ඒක තිස් දෙකේය
මේක හැට හතරේ වුණත්
වෙන එක වෙනවාමය
04-11-2025
කවිය බලන්න
