උදුම්බර සොයමුද
සරුංගල් ඉගිළිලා දේදුන්නෙ දැවටේවි
වලාකුළු කැටි ගැසී
වැහි බින්දු මුසුවේවි
තාරකාවියො ගගන
මුකුළු කොට සැඟවේවි
ක්ෂිතිජ මල් උයනේම
අපට අප හමුවේවි
කඳු සිරස තැන්නකදි
මලක් වී පිපෙනවද
දියවැලක් වී හෙමින්
කළු ගඟට බසිනවද
සුළං රැල්ලක එතී
මල් සුවඳ ගෙනෙනවද
මඟ හැරුණ ලස්සනම
කවිය හෙට ලියනවද
උදුම්බර මල් සොයා කුමට
අපි වෙහෙසී
දහස් පෙතියා පිපෙයි
ගෙමිදුලේ දිගැසී
කුරවි කූජනයකින් ගෙනෙයි රස මියැසී
නොමිනිසුන් හමුවේද
පෙම් ලොවට සැහැසී
දළඹු සිහිනය දිගේ
ඇදෙයි දිගු ගමන
පියාපත් පිරිමදී
සමන් ගිර මුදුන
රොන් බරින් හමා එයි
සිහිල් වූ පවන
සරාසඳ සෙවණ යට
නිවා ගමු ගිමන
කවිය බලන්න
