අප්සරා මමයි
ඉවසනු කෙලෙස හැඟුමන් නොදැනෙන්නා ද
ඇවිළුණු පවස සිතුවම් ලෙස ඇන්දා ද
පවසනු මෙලෙස ගැහැණුත් තව උන්නා ද
කහවණු පිණිස නිරුවත් කර දැම්මා ද
පහසින් කලා තෙළි තුඩ හස මත රන්දා
රහසින් පෙළා යයි හද විළි බිය කැන්දා
යටැසින් බලා මගෙ සිතු හඳුනන හින්දා
විගසින් වලා සවි ගෙන තැබුවයි අන්දා
මොහොතක් නෙත යොමා තෙළිතුඩ පිසදාලා
රහසක් කියනවා වැනි මදහස පාලා
දහසක් දකින මා ළැම ගිනි අවුලාලා
තපසෙක් ලෙස ගියා නොබල ම පිටු පාලා
නිරුවත් කෙරුන ළැම දුටුවත් දෙනා සැම
එක සිත් බැඳුණ පෙම වෙති සිත්තරාවම
සුසුමත් පතන හැම පැතුමත් පුරාවම
පියුමත් රැගෙන එන නුඹේ අප්සරා මම
ඇඹිලිපිටිය
කවිය බලන්න
