රත්තරං දෙමව්පියො
හතර වරිගෙම බඩ පිරෙන්නට
පීස මඩුවෙන් රොටිය කාලා
පුතයි ලේලියි ගෙදර එන කොට
අම්ම ඉන්නව උළුවස්ස ලඟ
කුස පොත්ත කොඳු ඇටේ ඇලිලා
"නිදි නැතුව ඇයි? මඟ බලා ගෙන"
"දවල් උයපුව නේ තියෙන්නේ
රත් කරෝතින් හීල් වෙයි නේ
ඒක හිනිදයි උඹල එනකන්
බලා ගෙන උන්නෙ"
"හරිම මහන්සයි අදනං
අපිට මුකුත් එපා රෑට
අම්මා රත්කරන් කන්න
මොන එහෙකට අපි එනකන්
මහ රෑ වෙනකන් හිටිය ද?"
පුතයි ලේලියි ගෙට ගියා
වාහනේ මිදුලේ තියා
"රත්තරං දෙමව්පියො"
පස්සෙ තිබුණා ලියා
21. 03. 2023