තරු සැඟවුන අහසෙ
හුදෙකලාව හිනැහෙන
නුඹත් හරි ලස්සනයි
අමාවක දාට රෑ

පුරා හඳට ලියැවෙන ගී
ඔබ වෙනුවෙන් නොලිව්වාට
නිදි නොමැති දෑසට
රසඳුනකි ඔබ දසුන

මෙතෙක් ඔබ කියව ගත්තේ
පාලු හදවත් කුලකයේ
තවත් එක් අංශුවක් ලෙස
ඒත්....

හීනියට විවර වන කවුළුවේ
හීනි හිඩැසින්
ඔබ තුළින් මා දුටුවේ
හීනියට මෝදු වන
සංසාර පුරුද්දක
හීනි සෙවනැල්ලක
සොඳුරු සේයාවක්මය..

රෑ පුරා රැව් දෙන
රැහැයියන්ගේ ගැයුම
අඳ්‍රරට පෙම් බඳින
වවුලන් ගෙ රස කතා
නොඉඳුල් සුවඳ හමන
සේපාලිකා මල් පලස
කොඳමල් පිරිවරා
සිනාසෙන තඹුරු පෙති
පුන් සඳට වාගේම
නුඹටද ලෙන්ගතුයි...

මතක සටහන් පොතේ
දිනෙන් දින මෝදුවන
දිගම දිග කතාවක්
ලියා නිමවෙන දිනයෙ
දැනෙනා සැහැල්ලුව
ඔබටත් දැනේවි...

සොළොස් කලාවන්
ටිකෙන් ටික සපුරා
පුන් සඳක් ලෙසින් ඔබ
දොරට වඩිනා දිනයෙ....