අඳුර සමග නුඹ ආවද පරවුන සිත් සනසවන්න
අරුණ රැගෙන නුඹ යනවද නොපිපි කැකුළ පුබුදුවන්න
සාංකාව පිරි නෙත් යුග වත්සුනු යට සගවන්නට
කොමල සිනාවන් මැව්වද නොතෙමුනු හද තෙමාලන්න

අඳුරු පාලු වීදි පුරා - අනඟ බඹරු සරන රැයක
පෙරුම් පුරා ආ ගමනක - බෝසත්වරු සොයනවාද
දෝරෙ ගලා යන සෙනෙහස - සඟවනු කෙලෙසක ලය මත
ලැම තාලෙට නැලවිලි ගී - ලොවට හොරෙන් ගයනවාද

මලක් විය නුඹත් තුරු මත - සුවඳ දී පිපී හිනැහුන
බිඟුන් නොව බඹරුන්ට - පහස වී තැලී විසිරුණ
මතකයේ කදුළු බිඳු පෙති තලන හැම රැයක
කියා දෙනු හැකිද මේ ලෙස - පරව ගිය සිහින කුමටද ...?