අවපස අඳුරට ඉඩ දී
ගලන කැළුම් හෙමින් නිවා
අමාවකට සුයාමයේ
සඳ සැතපෙනවා,

අහස් ගඟේ සුනිල දියෙන්
පැන් සනහා රෑ රැජිනිය
දුරින් ඉඳන් කලා මවා
කිරණ බෙදනවා,

තරු මල් නිල් අහස පුරා
පුර පෝයට රටා වියා
රනින් පෙරූ සඳ වතුරින්
ලොව නහවනවා,

කුමුදු කුසුම් රෑ කුමාරි
ඇයට පෙමින් පිපි කඩුපුල්
නිසායමේ තරිඳු පුදට
සුවඳ සලනවා,

තරිදු වතින් විහිදි කැළුම්
ඔය උවනෙත් දුටිමි කලින්
කවුලුව හැර දොරට එන්න
යළි සසඳන්නම්,