ෆීනික්ස් පක්ෂියා පියාපත් විදාලයි
උඩඟු හොට මදක් ඇර
අළස ඈනුමක් ඇර
සෙමෙන් ඇසිපිය හරී

ඇඳෙන් බැස හිරි කඩා
අළු මතින් පියනගයි
ගෝල්ඩ්ලීෆ් කොට කෑලි
තැලෙයි යටහත් බවින්

තවම උගුරක් තියෙන
ත්‍රී කොයින් ටින් එකක්
පය වැදී බිය වැදී
හඬනගා පසුබසී

නාන බේසම ළඟැ'ති
කණ්ණාඩි පොඩ්ඩකින්
ෆීනික්ස් පක්ෂියා
හොට උලා හැඩ බලයි

අළු ගැහුණු කෙස්සකින්
ඇද බලා කට අයන
මැදි වයස් පසුකරන
රැවුළු කොට සිසි වුවන
සිසීපස් ගමරාල
කැඩපතෙන් එබෙන විට
ෆීනික්ස් පක්ෂියා මවිත වෙයි!