සිදාදියෙ ඉඳන් නුඹ එවු ලියුම් කරදහිය
කියවගෙන කියවගෙන කියවගෙන ගියා මම
හිත ඇතුලෙ හති දදා නුඹ පිණුම් ගහන කොට
සෙනෙහසින් කිති කැවුන මගේ සරුවාංගෙම පිස්සුවෙන් තටු හෙව්ව ගෙයි මුල්ලක් නෑර
පියාසර කරන්නට නුඹ සොයාගෙන රෑම

සිල්ලර ජීවිතේ අඩුපාඩු පිරිමැහුව
කරගැට මල් පිපිනු අපෙ අම්මගෙ දෑත
හැඩ ගවුමක් කරපු චීත්ත යාර දෙක
සැවැන්න මුල් එක්ක හැංගිලා හිටිය
යන්න ගමනක් නැතුව
බටකොල පෙට්ටිය පතුලෙම

ඉර ගල වැටෙනකොට
කන්දෙ හෙවනැල්ලෙන් වැහුන ගම
කඳු මුදුනෙ පිපුණ‌‌‌ මල් හිටිය බිම බලාගෙන
මල් ගවුම සැරසුනා නුඹෙ පහස විඳගන්න
කන්දටත් නොදැනෙන්න පල්ලන් බැස්ස මම
ජීවිතේ පන් මල්ලෙ ඔබාගෙන

මහ මූහුද ගිල ගද්දි නියපොතු හඳ
මම නුඹට තුරුළු වුනෙ
වැල්ලෙ කළු ගලක් උඩ
පපු කුහරෙ සෙනෙහස පුරෝගෙන

මහ සයුරට හොරෙන් සහෘද මිතුරු කැළ
රැගෙන ආ අමෘතය රසකලා මධුසමය
පා වුනා සිතිජයෙන් ඈතට
සුරඟනක සුර කුමරුන් සමඟ
නැගී දේදුනු ඔරුවක

වෙන්දේසි වුනා සෙනහස
ලුණු මිදුන‌‌‌ සුදු වැල්ලෙ
කීතු කීතු වෙලා තිබුන
රතුපාට මල් පිරුවටේ
නුඹ පෙනෙන්නට නැතත්
හිටි පියරෙ මම හිටිය
පොලිතින් බෑගයක
ඇස් අරන් නිදාගෙන

21- 24- 2022