තුරු හිස් රිකිලි මත නලියන හිම බින්දූ
මුතු පෙළ විලස දිස්වෙයි ගෙල මත රැන්දූ
බේරෙන විටදි දිය බිදු සීතල කැන්දූ
දෙසවන කොදුරනා විලසයි ගී සින්දූ

සුදු රෙදි පොරවගෙන සිටිනා පාර පුරා
පා සටහන් මැවේ සුන්දර දසුන් අරා
අමුතුම කලාවක අසිරිය ලොවට පෙරා
සීතල පවන් විසිවෙනවා දසත සරා

සේපාලිකා මල් ගිලිහෙන විලාසෙට
හිම කැටි එකින් එක විසි වෙනවා බිමට
මුදු මල් සුවද ඉව කෙරුවද පුරුද්දට
මුව මත නැවතුනේ සීතල වතුර කැට