පාසැල් සමය නිමවී ටික කලක් ගියා
ඉන් අනතුරුව මා රැකියාවකට ගියා
සමහර යෙහෙළියන් හදිසියෙ දීග ගියා
කවුරුත් කියයි මා දැන් යුවතියකි කියා

අම්මා අප්පච්චි මාවත් මැදින් තියා
හුරතල් කරනවා තවමත් දුවේ කියා
විද්දේ නොමැත තවමත් මට අනංගයා
නොදනිමි කොහේ ඇතිදැයි මගෙ කුමාරයා

අම්මා අප්පච්චි දෙදෙනා තනිකරලා
දීගෙක යන්න සිදුවෙයි දවසක අඬලා
කොහේ ගියත් මම තනියම වෙරදමලා
ආපසු ගෙදර එනවා අම්මා සොයලා

මට මගෙ කාමරය දෙව් විමනකි ගෙදර
අම්මා කවනවා මට තවමත් නිතර
යන්නට සිතක් නැත මට කොහොමත් එතෙර
බින්න කසාදයකට ඉඩ ඇත ගෙදර