සෙනඟ බොහොමයි
මැදිරියේ තෙරපෙන
තැලුම් කන පීලි මත
සෙමෙන් ඉදිරියට ඇදෙන

ඉඳ ගත්තවුන් සිහිනයක සැතපෙන
මළානිකව කට්ටියක් හිටගෙන
කොහෙට හරි වාරු වුණ
එළියෙත් සටනක
එල්ලීගෙන තනි අතකින්
තවත් දවසක් ගෙවන්න

අතින් කටින් එල්ලන් කන්තෝරු මල්ල
මට්ටම් ලීය ආසන යටට තල්ලු කරගෙන
සහල් එළවළු ලෙසින් ගෙදරට අමෘතය රැගෙන
යන්නෝය බාගෙට ලිහුණු වස්ත්‍රෙන්

හෙට උදෙත් මේ ලෙසම
ඔක්කොම ඒවි
රට ගොඩ නඟන
රාජකාරියට
පිය මනින්න
ජීවිතය රැඳුනොත්