නෙක විසිතුරු දෑ විකිණෙන
දෙපසේ කඩපිල් ඉදිවුනු
ජනයා නිතරම ඇවිදින
නගරය මැද මහ වීදිය

තැනෙක රෙදි ඇඳුම් පැළැඳුම්
රන් අබරණ දිලෙයි දිසෙත
විලාසිතාවන් දක්වන
මහා පුවරු ඇත ඉහළින

කලා කරුවෙකිය කුටියෙක
සිය නිමැයුම් අතර හිඳින
කිසිවකු නැත නෙත් හෙලුවේ
මිලකට ගන්නට සිතුවම්

අසලම ගොඩ වෙදෙක් වීය
හිස් කබලකි මේසය මත
විකිණෙයි තෙල් කුප්පි ගොඩක්
නොමදැන එහි ගුණාගුණය

ගැදි පැදි රස මිණි ඇමිනූ
පොත් රැසකිය තවත් තැනෙක
තිබුනත් ගන්නට නොමිලේ
කිසිවෙකු නොබලති ඇසහැර
* * *
යන්නං වාලේ ඇවිදින
දෙපා දුවන සිත ඇවිලුන
මිනිස්සුන්ට එක්වෙන්නට
කියනව මට මගේ හිතත්

ජීවිතෙ ආදරේ මරණෙ
ගැන කවි කොළ වල ලියලා
ඇවිදින්නට සිතෙයි මටත්
මගෙ ඇඳුමේ එල්ලාගෙන

සෙනඟ අතර තෙරපෙද්දී
ගැලැවී ගිය මගෙ කවියක්
කවුරුන් හෝ අහුලාගෙන
කියවයි නම් සතුටකි මට