දිනෙක හමුවිය හොරෙන් ඉකිලන - සඳට රහසේ සෙමෙන් නික්මුණ
පොළෝ තලයට කඳුළු වස්සන - තාරුකාවක් දැවී අළු වුණ

ඈත අහසේ රෑට දිදුළන - කිමද තරුවේ තනිව ඉකිලන
තාරකාවට සෙමින් ළංවුණ - ඇසුණි කිිසිවෙක් ඇගෙන් විමසන

සඳට එළියක් දෙමින් බැබළුණ - තරුව විය මම ඔහුට පේ වුණ
දිනක් විය ඔහු බෝ කුරිරු වුණ - තරුව කීවා අහක බලමින

නැතේ තව නුඹ හදේ රන්දා - සඳෙන් ගිලිහුණ වදන් නින්දා
දරා ගන්නට බැරිම හින්දා - තරුව රහසේ ඉකිත් බින්ඳා

මෙතෙක් කල් වූ සරා සඳවත - වුණා එක්වර ගරා යක්වත
දරා ගන්නනට බැරිව මේ වත - තරුව රැක්කා ඇගේ මුනිවත

දැවී යන මොහොතේවත් - මහදෙ නැත කහටක් වත්
සඳෙහි මතකේ වත් - ඉන්න ලැබුණොත් එයම යහපත්

මෙසේ කී බව තරුව හිතවත් - දන්නේ නෑ තව අහෝ! සඳ වත්
පාවි යන මේ වළා රොදවත් - ගිහින් කියපන් සඳට දැන්වත්

- තීෂ්‍යා දුල්මිණිගේ වසන්තයේ දවසක් නවකතාවෙනි-