මන්දාරම් අඳුරක වංකගිරියක වුව
දෑස් පියාගෙන හරි
හොයාගත හැකිය මග
හිතුවක්කාර හිතකට
ප්‍රේමයේ නගරය පුරා සරන අතර.
එවන් නගරයේ තැන තැන
නාරි ලතා කතා ලතාවට
අංගාර ඉලූ ශෘංගාර පෙනුමට
කැටයම් මායම් පොකුරකට
තිබෙනු ඇත වෙන්දේසි අපමණ.

අතිනත් බැඳගෙන කොනහමින් නිය තුඩු අග
පිටට පිට දී හිඳිද්දී
දුටු විට අහස් ගඟ
කඩා දෙද්දී තරු පොකුරු දෝතට
නොගෙනම බැරි විට
දැවෙද්දී විසි කරනු මිස ඈතට
වෙන කුමක් කරන්නද?

වානේ වුනත් පරදන
අහංකාර දැඩි හිතක් වුව
දිය කල හැක වෙඬරු උණු වන ගානට
ප්‍රේමයේ සෙවනැල්ලට මුවා වී
සම්මුඛ වූ කල දෑසට දෑස
සුසුමක රිද්මයට අනුගතව
කිව්වා නාහන හිතුවක්කාර ගැහැණු හිත්
නොදෙවෙනි පිරිමි හිතකට.

ගලද්දී වංගූ ගහමින්
හිතූ හිතූ පරිදි ජීවිතය
වියරු වැටෙද්දීත් හදවත
තනිවම සිනාසී නැගිට ඉගිලෙන
ෆීනික්ස් ආත්මය.....
ටැටූ මෙන් නොසෙල්වෙන
කෝවක දමාවත් වෙනස් කල නොහැකි එඩිතර ගැහැණු හිත.

කලුවර අරටුව මැදින්
දළු ලන තෙක් බලා හිඳ
ඉවසන අයුරු පුදුමය
පිරිමි හිතකින් පුදන ප්‍රේමය..

පසු නොබසින කල එකිනෙකාට
එවන් හැඩි දැඩි ස්නේහයක වියරුව
දරා ගනු නොහැකි මොහොතක
එකෙක් මිය යා හැක
එයයි නියමය.

ඉතින්...
ඔබ පෙම් කල යුත්තේ
එවන් අවදානමක් රැගෙන ම ය!!