ලන්ඩනයේ සිට මුදා හැරෙන ශ්‍රී ලාංකේය කවි සරණිය

කවිය සහ වෙන්කට්

කවිය සහ වෙන්කට්

වෛද්‍ය ශ්‍යාම කුමාර මුණසිංහ - කොල්චෙස්ටර් - එංගලන්තය
2022-July

උපන් දා සිට හිතේ රජ වී
ඉන්න මව හා පියාණන් වග
නිවන් යනතුරු එකට ඉන්නට
පතා ඇවිදින් දාල ගිය මග
එවන් සුභ හා අසුභ වූ රස
නිමිති එක් තැන් වෙලා හිත අග
ලියන්නට යෙදුනා පොතක් ලෙස
තියා කවි සංකල්ප එක ළඟ

ඔහොම හෙමිහිට උපන් කවි පොත
එළිදැක්ම අත ළඟට පැමිණී
ළඟම රසිකයො මුහුණු පොත වෙත
පැතුම් වැස්සක් එවා තිබුණී
නියම කළ මිල ගෙවා පිටපත්
ගන්න නම් කවුරුත්ම නොවුණී
ඔහු ම නොමිලේ යැව්ව පිටපත්
ලැබුණ බව වත් තාම නොදනී

සීතලේ ගල් ගැහී වාගේ
ගොළු හඬින් සුභ පැතුම් එවලා
පින්සලේ කෙඳි වගේ එකටම
ළඟම උන් අය යද්දි හැලිලා
සිංහලේ මළ පොතේ අකුරක්
නොදත් මුත් සහයෝගෙ පතලා
කේරළේ ‘වෙන්කට්’ ඇවිත් පොත්
දෙකක් ගත්තා මුදල් ගෙවලා