නැත කෙළවරක් තිබෙනා කරදර බොහොම
කියමින් දුකෙහි ගැලිලා ඇති අය එහෙම
කියනුයෙ ඇයිද කියලා විමසමු මෙහෙම
හැකිවෙයි විසඳුමක් දෙන්නට හරි කොහොම

කරනා කිසිත් හරියන්නේ නැත අපට
කොඩිවින කරල ඇත කවුරුන් හෝ කපට
සමහරු ඉරිසියයි සිටිනා විට සැපට
එනිසා බලයි අප වට්ටන්නට ලිපට

කාලා ඇඳල අපි සිටිනා විටදි හොඳින්
කටු අනිනවා වැනි සමහර අයට ඉතින්
කාලය ධනය වැය කර කර කුමන ලෙසින්
හෝ වෙර දරති අපගේ සැප නසන රිසින්

මගෙ රැකියාව බැහැ නිසි ලෙස කරගන්න
වෙළඳාමද නොහැක ඉහළට ඔසවන්න
පැන්නුම් පිල්ලි කරමින් අප වනසන්න
වෑයම් කරන හින්දයි මේ සැම ඔන්න

මේ ලෙස නොයෙක් දේ මනසට දමාගෙන
පීඩා විඳිති නැති කරදර හදාගෙන
මේ දේ වලින් වැළකී දිරි වඩාගෙන
සුවසේ වසමු දහමට සිත යොමාගෙන

Photo credit; Benjamin Balázs