මවකට සිය දරුවා මහමෙරකි හැමදාම
දන්නවා මම අම්මෙකුගේ ආදරේ සිඳෙන්නෑ කිසිදාක
බිළිඳු හදවතක් පණ ගැහුණා මේ කුස ඇතුළේ පෙරදාක
ඉතින් කිරි බිළිඳෙකුට දෝෂ දෙන්නට හිතිලා නෑ තුන් හිතට..

යකින්නක්ද ,දෙවඟනක් දැයි සැකයකි මිනිසුන්ට
ඒ නොවේ ඇත්තටම මමත් අම්මෙකි කිරි සිහින විසිරුණු
ආශාවකින් හිටියා සිඟිති මුව දැක ගන්න..

ගෙලවැල ලා ගත්තේ නෑ ඇත්තටම
නොයෙක් අතවර දරා සිටියත් අන්තිමට
මරා මා එල්ලුවා ගිරි හිස උන් කවුරුන්දෝ නොදන්න
"බාලගිරි අද නොවේ හෙට "කියා
අඟුරු අකුරින් ලියා ඇත
බිළිඳු නිවසන නිවෙස් වල .....

බිළිඳු හිස අතගා සිනාසී නික්ම යමි
මා අහිමි බිළිඳුන් සිහිකර වැළපෙමි
කිසිදිනෙක බිළිඳෙකුට අහිතක් නොකරමි

ගිරිදේවි මම සංසාර පව් උහුලමි..