තරුත් පායන්න ඇති නිවි නිවී දිලිසිලා
සඳත් බැසයන්න ඇති හිස් අහස හඬවලා
සිතත් නැවතෙන්න ඇති දුක් අතර සැඟවෙලා
ජීවිතය ගලන්නැති කඳුල මත හිනැහිලා.

නොලැබු පැතුමන් රැසකි ලැබුනු දෙයකට වඩා
නොලද සෙනෙහසක් වෙද හදෙහි රැඳුනට වඩා
නොපිපි මල් වල සුවඳ දැනේ පිපුනට වඩා
නොවැටි කඳුළක දුකක් දැනේ හැඬුමට වඩා.

දිලුන තරු නිවෙන්නැති නෙතින් හිනැහෙන්න පෙර
පැතුම් මල් මියෙන්නැති සිතුම් නැවතෙන්න පෙර
සඳත් බැස යන්න ඇති අඳුර දුරු වෙන්න පෙර
කවිත් ලියවෙන්න ඇති හදින් ගිලිහෙන්න පෙර.

වෙරළ වෙත දිව ඇදෙන දිය රැල්ල පරිද්දෙන්
නුබ සමඟ සිතිජයේ හමුවෙනා පරිද්දෙන්
දුක දරණ හද මඬල ඉකිබිදින පරිද්දෙන්
එක්වෙලා වෙන්වෙමුද ලොවෙහි ඇති පරිද්දෙන්.