නත්තල් සීයා - නත්තල් ගහ යට වාඩිවෙලා
අම්මලා තාත්තලා දෙන තෑගි පෙට්ටි
ආයෙත් පුංචි එවුන් අතට දුන්නම
පුංචි එවුන්ට හරි සතුටුයි
ඒ විතරක්ද ..........
නත්තල් සීයට තුරුලුවෙලා
ඉන්න ෆොටෝ එකකුත් අම්මලා තාත්තලා
සතුටින් අරගන්නවා

මම බංකු කොනක වාඩිවෙලා
බලන් ඉන්නවා
ඔන්න... නත්තල් සීයට පුංචි විවේකයක් ඇවිත්
මම වාඩි වුනු බංකුවේම
නත්තල් සීයත් ඇවිත් වාඩි වුනා
කටකොනකින් යන්තම් හිනා වුනා
ඒ හිනාවේ හැංගි තිබුනේ
දුක්බර ආයාචනයක්

මිනිත්තුවක් දෙකක් ගෙවුනා
නත්තල් සීයා මගේ දිහාවට හැරුනා
කෝපි එකක් අරන් දෙන්න පුලුවන්ද ඇහුවා
බොහෝම සංයමයෙන්

මම කොපි එකක් අරන් ඇවිත් දුන්නා
නත්තල් සීයා, අසාවෙන් කෝපි උගුර උගුර බොනවා
ඔහු මට මෙහෙම කියනවා
" මගේ පුංචි එවුන් දෙන්නා
හවස මම එනකම් බලන් ඉන්නවා
නත්තල් සීයට ඇඳගෙන - මේ තෑගි බෙදලා
හම්බවෙන සොච්චමෙන්
රෑට කෑම ගත්තම
මගේ පොඩි එවුන්ට - නත්තල් තෑගි ගන්න
මුකුත් ඉතුරු වෙන්නේ නැහැ....."


නවසීලන්තය
29 දෙසැම්බර් 2024