දත යුතු කරුණු ගොමුව - 18

රජකු නොවූ රජ

368. වළගම්බා රජුගෙ දස් - විස්කම් ඇසු වේ
ඉපැරැණි රජ දහන පිළිබද බස් දෙඩු වේ
තෙරපුණු සිතිවිලිය පද බැඳ කවි කෙරුවේ
සමනල නුඹට නිරතුරු ජය මා පැතුවේ

369. මේ රජ දහන පසුකොට පහළට යන්න
වේ තැන නම් ලැබූ වෙල මඩුවන් තැන්න
සේ මහ විසල් මන්දිර පරසිදු දන්න
දේ නිසි ලෙසින් විසුවක පිළිබද මැන්න

370. රජ කෙනෙකු ද නොවී ඉන්නට රජෙකු වගේ
ගජ මිණි-මුතු-මැණික් ලැබ දිවි පැවැති මගේ
ධජ නංවමින් අණසක ගම් - දනව් දිගේ
නිජ බිම පුරාවට පැතිරී ගියා වගේ

371. උස් කඳ මහත හැඩි - දැඩි බාහු ද දෙ පයේ
මස් ගොබ පිපී එල්ලී දෙපසට සරි යේ
විස් කම් දකිනු හැර එක එල්ලෙට බැරි යේ
නස් පැත්තියයි ගියොතින් හරඹෙට පිරියේ

372. හැම සැපතකින් අඩු නැති දිවියට වන්නූ
මිනිසත් ගුණය කරුණා ගුණ පිට පෙන්නූ
කොතරම් හැඩි- දැඩි ව දරුණු ව සිත ගැන්නූ
වුව දිළිදුනට නොගැණ ම සේසත දුන්නූ

373. සමනල නුඹ කියන් තොරතුරු මොහුගෙ වටා
බැදි කට කතා ගොතමින් රස කර ම නටා
රට දන නොදැන ව ද මොහුගේ දරුණු රටා
අමතක නොකර කවියෙන් දෙනු නොවී මොටා


සමනලයා දුටු කළුකුමාරයා
මඩුවන්වෙල මහදිසාව 24


374. දිගු ගන රවුල දොඹ නෙත් රත වසා නො-යා
තෙද ඔද ගතිය වුවණත මැද නගා ති -යා
“මඩුවන්වෙල දිසා හාමුදුරුවෝ” මැ කි- යා
අමතති එ ගමු මොහුට ම “කළු කුමාර”- යා

375. අත් පා දිගේ මස් ගොබ ලියලා වැඩුණේ
අතු හා රිකිලි ගස්වල නොකපා කැඩුණේ
උසටත් මහතටත් සරි ඇග -පත දැමුණේ
කාගෙත් “දුටුව පමණින්” සිරස ම නැමුණේ

376. ගති ඇති නමුදු හැඩි-දැඩි ව ම ගුණය සැරේ
සලකුවෙ සැමට ආගන්තුක දනා කෙරේ
සිත උල්පතකි හැඟුමට බර සිනා පෙරේ
බැඳ අලි - ඇතුන් කෙහෙලිය ගති පනා-මුරේ

377. අබිමන මහන්තත්ත්වය මොහු මත්තෙ ම ලූ
මරණෙට මුහුණ ලන තුරු ජය ගත්තෙ ම ලූ
වචනත් රාජ අණසක ලෙස ඇත්තෙ ම ලූ
හඬ කුසරජුගෙ සේ වෙනසක් නැත්තෙ ම ලූ

378. මඩුවන්වෙල - ඇඹිලිපිටිය ද රක්-වාන
මිණිපුර - පනාමුර මගෙ සිත ගත් තාන
ඉදි කළ මහ වළව් ඇත වරදක් නූන
තෙද-ඔද මන නගයි බැලු-බැල්මට පේන

379. දස්කම් අසකු පිට හිද දිය තරග රඟ
නැත්නම් සුරුන් යති දෝලාවකට නැග
ගම්-බිම් මුතු-මැණික් මොන දෙයකින් ද හිඟ
දුටු නම් වැද වැටෙති දහසක් දෙපය ළඟ

380. දවසක මහ සලක නඩු විසදන්නේ ලූ
සවසක ගල් දොරටු ළඟ සැනසෙන්නේ ලූ
කවියක - කලාවක රස තැන් දන්නේ ලූ
නැටුමත් වෙස් අරා වෙරිකොට ගන්නේ ලූ

381. දැඩි එඩි සිතට මෙත් -කරුණා ගුණ මුහු ය
දෙ වනු ව ලකේ කිත් හඬ පැතිරූ රහු ය
නිල-බල-තල හමුවෙ අන් බල-තල පුහු ය
“මඩුවන්වෙල දිසා‌ හාමුදුරුවෝ” මොහු ය

(මතු සම්බන්ධයි.)


2025.01.01