මගෙ නම
බිම්බා දේවි වර්ණකුලසූරිය ස්වාමීනී
සිද්ධාර්ථ කෙනෙක් වෙනුවට
දේවදත්ත කෙනෙක් මුණගැහුනෙ
කයිමන් දොරකඩදි ස්වාමීනී
බොහොම හදිසියෙන්
කෝච්චිය අල්ලගන්න
දුවමිනුයි හිටියෙ මම
කඩු ගන්නාවෙ කන්ද නගින්න
පටන් ගන්නකොටමයි
අපි ප්‍රේම වන්තයො වුණේ
නෙළුම් කුළුණ විතරක් නෙවෙයි
අයිපල් කුළුනත් මුලින් උදුරන්
මගේ පාමුල ගෙනත් තිබ්බා
ගමනාන්තෙට ලඟා වෙද්දි.
නුවරින් බැහැල ගෙදර ගියෙ
රටක් රාජ්‍යක් අයිති කරගෙන
එදා ඉඳන් හීන මැව්වෙ
අයිපල් කුළුනටත් වඩා උසට
ආදරේ දෙන්න
ඒ වගේම ගන්න
ජීවිතේ පුරාවටම.
ඒත් දවසක් ඔෆිස් එකේදි
පොඩි කසු කුසුවක් ඇහුණා
රැ ගෙදර බත් මුට්ටිය
පොඩි වුණා
පොඩි උන් බඩගින්නෙම
හීනෙන් ඉකි ගැහුවා
එයා ආයෙත්
අර අයිපල් කුළුනම
උදුරගෙන ඇවිත්
අපෙ ඔෆිස් එකේ සුන්දරීගෙ
පය පාමුල තියල තිබුණා
ඒ හින්දා ගෙදර තුන් බියම
ඇතිවුණා ස්වාමීනී
දුර්භීක්ෂ බිය
යුධ බිය
මරන බිය
බැරිම තැන තමයි සුන්දරීව
ජේතවනාරාමෙ ලඟ කානුවෙ
හංගල දැම්මේ
ඒක කලේ මමයි ස්වාමිනී
වරද කාරිය මමයි.


2024.12.01.