තවත් වසරක් ගෙවීගොස් එයි උදාකරදී නව වසක්
දොලොස් මසකුත් ගෙවීගිය හැටි වගෙයි හරියට සති දෙකක්
පුරුදු නුපුරුදු සටන් මැද්දේ එකක් පසුකර තව එකක්
සතුට සැප දුක සිනහ කඳුළුද කීවෙ ජීවත්වෙන බවක්

කෙනෙක් සතුටෙන් ඉපිල යද්දී ඉපදිලා පවුලට බබෙක්
තවත් ඇසකින් කඳුළු සැලුනා නැතිවෙලා පෙම්බර අයෙක්
සිතක් සැනසෙන විටදි මොහොතක ලබා ගත්තායැයි ජයක්
වැඩිය ඈතක නොවෙයි තැවුනේ පැරදුනා යයි තව සිතක්

දිනක් ඇරඹෙන විටදි හිරුනැග උදාකර පැතුමන් දහක්
බැසගියා අවසනේ සවසට ඉටුව නොඉටුව ඉන් යමක්
නැවත පසුදා අවදිවී යළි පටන් අරගෙන තව වරක්
වෙනස් නොවෙනස් ක්‍රියා දාමෙක යෙදුනු තුන්සිය හැට පහක්

ලබන දෙදහස් විසි පහට යමු රැගෙන යහ හැඟුමන් රැසක්
වෙහෙසවෙමු මල්ඵල ලබන්නට ගෙන දිරිය හා හැම වෙරක්
දයාකරුණා ගුණය වඩවා තර කරමු සොහොයුරු දමක්
සැවොම එකතුව ගෙවමු සමගිව එළඹි වසරේ සැම දිනක්

අවැසි අපහට සමව පැතිරුනු ලොවපුරා එක සාමයක්
සැවොම කැපවෙමු පතුරවන්නට සදා පවතින ප්‍රේමයක්
මනසෙ නිදාහස ලැබෙන ගතසුව ජයෙන් දිලෙනා කාලයක්
පතමි ඔබහට ලැබූ වසරේ සැම සතුට සහ ප්‍රීතියක් !