තුන් යම දුටුව සිහිනය නෙත් අසල තබා ලෙන්දොර විවර කෙරු දිවිමග විජය ලබා
කැන්දන ගුණසුවඳ දසතම රුවැති සොබා
සුන්දර වසත් සමයක පිපි කුසුම පබා

සියුමැලි ඇඟිලි තුඩු කරගැට නැගෙන තුරූ
නිදිනැති රෑ ගණන් පොත් පිටු අතර සැරූ
දින සති මැදින් ගෙන ගිය මල් සමය හොරූ
සැනසෙනු දුවේ නුඹ අද ජය කිරුළ දැරූ

කොස් දෙල් මිරිස් තුනපහ අත නොම ගැටුනේ
ගස් වල පිපුණු මල් දෙනෙතට නැහැ පෙනුනේ
අස්වැසුමකට ඉඳ හිට ගීයක් ගැයුනේ
මස් ලේ වල පවා වෙර වීරිය රැඳුනේ

පවසට දිය නොමැත කතරක වැලි අතර රැයකට එළිය දෙන්නේ සඳමයි නිතර මිණිකැට ගලා යයි ගං දිය යට වැතිර දුවෙකුට දිරිය දෙයි ලද ශිල්පය සතර

නුඹත් කුස දරා ගෙන සමයෙදි ගැබිනී
මමත් පියනැගුවෙ සරසවියට කැලණී
සමත් උනා සිව්වස බාධක මැදිනී
උගත් කමේ වත්කම හොඳ හැටි දැනුනී

ලස්සන මුතු මාල ඇතිමුත් රුවට රුවේ දිස්නෙට දිලෙන අබරණ ඉගෙනුමයි දුවේ
වැස්සට නොසේදෙයි කෙනෙකුට අයිති නොවේ
අස්වනු නෙලූ දා ගත සිත වෙහෙස නිවේ

තව ඉදිරියට යන්නට සිප් සතර මගේ
නව ඇරඹුමක් ඇත නව හිරු කිරණ නැගේ
දුව දිරි ගන්න මේ කවි මල් පියළි දිගේ
ලොව ජය ගන්න එවිටයි ලක් මවට අගේ

Photo credit;Allyson Beaucourt