.

සූතිකාගාරයෙන් ගැටගසා අංකය,
චූටී මොළකැටි සිනිඳු මල් පෙති අතට....
දමා උප්පත්තියට අංකයක්
ලොවට තව එකෙක් ලෙස..
ගෙවන්නැති කව්රු හෝ බිලක් ඔබ නමට...

කව්රු හෝ ගෙවා බිල් වටිනාකමට
ඇතුළත් වීමේ අංකයට
ලොකුම ලොකු බිල්ඩිම් ප්‍රමාණෙට,
දහතුන් වසරක් කටුව තුළ හැංගිච්ච ඉබ්බෙක් ව...

මොනවද ඔබ දන්නේ,

එකිනෙකා පරයන්න...
රේස් එක දිනවන්න...

හති වැටී,හති වැටී
පිටු ගණන් ලියද්දී

කවදාද උගත්තේ
අනෙකාට අත දෙන්න
බැරි ගණන් කියාදී

පන්තියේ අන්තිමයා
තුරුල් කර සිනාසී

පසුපසින් දිරි දෙන්න..

බිල් ගෙවා ඇමතියගේ ලේකම් ට පෝස්ට් එක ගත්තාට....
ඔෆීසියේ ඔබේ මේසේ
හිස් වෙද්දි ,පිරෙනවා
හිස් වෙවී, පිරෙනවා
හිස් වෙද්දි පිරිලා ද ඔබ

පවුලේ ම බර දරන්
පිටේ බැඳගෙන යමන්
කවදාද හැඳිනුවේ
ඔබට රිසි කුමක්දැයි

බිල් ගෙවා, බිල් ගෙවා
ඉතිං, ඉවරයක් නැද්ද...?

අංක සෙල්ලමේ ඔබේ
කාලයක් ගතවෙද්දී
ඉල්ලක්කම් වැඩි වෙද්දි

ඉතුරු වී තියෙනවද කාලය
තවම පෙර විලසමද ආලය
සුමට කර ඇල්ලුවද තාලය
නැහැ නේද ? ජීවිතේ පඹ ගාලය

ළමයාගේ විභාගෙයි
බිරිඳගේ ඇඳුමටයි
අම්මාගේ මරණෙටයි
තාත්තගේ දානෙටයි
මල්ලී ගේ මගුලටයි
අක්කාගේ බේතටයි
බිල් ගෙවා,බිල් ගෙවා
ඉවරවෙන දවසක් ඇද්ද

සීතල ගොරහැඬි අතට
ගැට ගසන්නට පෙර අංකයක්...
බිල් ගෙවා,බිල් ගෙවා
ඉවරවෙන දවසක් ඇද්ද

නැවතිල්ලේ හිතද්දී
ඔබ හුස්ම ගත්තා ද
බිල් වලින් තොර ලොවක
ජීවිතේ වින්ඳාද...

මිතුර,
අවසන
ඔබ ට ඔබවත් ඉන්නවද, නැද්ද...?

කුමුදි නෙත්තසිංහ, මොරටුව