නොමදා ශිල්ප දුන් ගුරුදෙවි සිත් රිදවා
පරදා ලනු රිසින් ඔහු තරඟෙට කැඳවා
රජිඳා වෙතින් බුහුමන් ලැබුවලු සොඳවා
පෙරදා බරණ නම් අවුකන ගල් වඩුවා

අවකන් දේශයෙන් සපැමිණි ඇදුරු වෙතින්
ලබමින් සෙල් පිළිම නෙළනා ශිල්ප සොඳින්
දැනුමින් සපිරි දා නරනිඳු වෙතට ගොසින්
සමතැන් ඉල්ලුවලු සිය ඇදුරිඳු ට හොරෙන්

දැකලා ගුරු-ගෝල දස්කම් සිය දෙනෙතින්
ලබලා දෙනු රිසින් දෙදෙනාහට සමතැන්
බෙදලා දෙමින් මහ ගල්පර දෙක දෙතැනින්
නෙළලා පෙන්වන්න කීවලු ‘බුදු සමිඳුන්’

බරණට ලැබුණි අවුකන ගල් පරය සොඳ
ගුරුහට දෙවා රැස් වෙහෙරේ ශිලා බඳ
දිනුමට තරගයෙන් පිළිමල් එඩිය බිඳ
කරනට නිමා අවැසිය පළමුව සබඳ

නැගගෙන පලංචිය කටුමිටි අතේ දරා
විඳගෙන රිදුම් ‘නැහුනත්’ වියපත් ඇදුරා
අවුකන ගලේ නිමවා බුදුරුව සපුරා
ජයගෙන බරණ ඔල්වරසන් දුනි පතුරා

නිමවනු නොහී බුදුරුව රැස්වෙහෙර ගලේ
දිවිදෙනු රිසින් ඇදුරිඳු පැන්නාලු හෙලේ
දැකගනු හැකිය තවමත් ඒ ශිලා තලේ
මියැදුණු ඇදුරිඳුගෙ නිමනැති පිළිමෙ මලේ