නැග්ගා බසයට පොල්ල ඩැහැගෙන මල්ල උරෙ රැඳෙමින්,
"යන්න විගහට යන්න පස්සට" ඇසුන රලු හඬකින්
තරුණ ගැටයෙක් මුදල් ගන්නව මෙසේ කෑගසමින්
ගමන යන්නට බසය අදිනව මල්ල බිම වැටැමින්!

සුහුරු ෆෝනය කොට කොටා රස විදින කෙලි සමගින්
යෙහෙලි යහලුවො හිනැහිලා තම අසුනෙ සුව විඳිමින්
මැදිවියේ පසුවන දනන් පත්තරේ දිග හරිමින්
ගමන යන්නේ මහල්ලන් උරහිසේ ඇතිලවමින්!

කුඩා දරුවකු වඩාගෙන යන මවක් ඇහැකොනකින්
දුටුවා තරුණය එහෙත් නෑ තම අසුන පිදුවේ නම්
රථය ඇදෙනව සීනු ඇසෙනව බ්‍රෙක් ගැසු විගසින්
වාරු නැති අය උකුලේ රැදෙනවා කෙඳිර හඬ ඇසෙමින්!

ගමන නිම තැන ලඟයි,ළමයෝ
සීනු මට නොපෙනෙන්
"යන්න විගහට බහිනු හනිකට"
වදන් කන ගැටෙමින්,
පැනුන පාරට මරුව පරදා පපුවෙ
හඬ ඇසෙමින්
ඉදිරි දින පසුවන්නෙ නිවසේ තයිල පිරිමදිමින්!

උදය හවසට පිරිත්, ධර්මය ඇසෙන මේ පෙදෙසේ
නැතිද හද උනුවෙන්නෙ දුබලන් දුටුවොතින් මෙලෙසේ?
මෙරට ඇති පහසුකම් විඳිනට
සැමට ඇත එකසේ,
අයිතියට පිටුපා නොයනු! ඔබ සැමත් වනු මෙලෙසේ !