සුදු බැමි වටේටම ඇත පිරම්ඩ් උසට
මවලා ශ්‍රී විභූතිය එහි කැටයමට
විල්පත්තුවේ සාරය ගෙන දැව වලට
වයිට් හවුස් ලෙස දිස්වෙයි පාරකට

කොමිස් දුගඳ හමනා පිළි ගඳ මුසුව
ඇසෙනා අඳෝනා උන් බලයට මැරුව
මන්දිර තුළින් පිටතට යා දෙනු බැරුව
පරඬැල සේ තබා ඇත එහි මුරකරුව

පාරට එබී රවනා සීසී ටීවී
ඕනෑ වුණොත් දවසක නඩුවට ඒවී
නීතිය නවා සිර කර පත්තිනි දේවී
ගණිකාවක් වසයි සිරියෙන් කන්‍යාවී

කෑමට යමක් තිබුණිද බලනට ඉල්ලා
පුවරුව මහා දැක එහි ඇති එල්ලා
බැම්මට ඇවිත් සුළුදිය පහරක් අල්ලා
සිනහව තද කරන් ගියෙ අසරණ බල්ලා