පාපැදියකින් සරසවිය වෙත පදින
මහැදුරු තුමෙක් නෙත ගැටෙන
කෙටි තාප්පෙකට වී හිටිය
'සහෝදරයින්' තිදෙන බිමට බැස
පාර පැන එදෙසට පිය නගති

ඉගිල ආ ගුරුළු රියක් යන මග
හරස් කළැයි චෝදනා නගන
මානව රොබෝවර වරයෙක් විසින්
අහකට තල්ලු කර දැමූ ඇදුරිඳු
වැසි කාණුවක් මත ඇද වැටේ

එයින් විසි වසරක් ඇවෑමෙන්
ජනතා ස්වයංවර තරඟෙන් පැරදී
පසු විපරමක නියැළෙනු පිණිස
ගත සිත නැගෙන විඩා නොතකමින්
ඔවුන් ඒ රැයේම හමු වෙති

නෙක හැල හැප්පීම් මැද අත නෑර
මෙතෙක් ආ දුෂ්කර ගමන අවසන
ඒකාන්තයෙන් අරවින්දයක් මෙන්
ජයග්‍රහණය ලබන බව පවසන විට
අදිටන පිරි දෑස් තාරකා මෙන් දිලේ

(සමාජ මාධ්‍ය පුවත් ඇසුරින්)


17.10.2024