කිරෙන් ඇරුණු දා ඉඳලා
පොතපතටම ළං කරලා
නවීන පන්නෙට හුරු කර
ළමාවියට වැට බැඳලා

ටියුෂන් නම් වරදින්නෑ
ටෙනිස් නොගහා හරියන්නෑ
දවස පුරා මැසිවිලි නම්
කවදාවත් නවතින්නෑ

සිංහල විතරක් නම් බෑ
ඉංග්‍රීසිත් නැතුවම බෑ
ලොක්කෙක් වෙන්නේ නැතිනම්
රටට මූණ දෙන්නත් බෑ

එහා ගෙදර යාළුවො ඇත
සෙල්ලම් බඩු ගොඩකුත් ඇත
ඒ උනාට කෙළි සෙල්ලම්
බෑ දොරගුළු තදකර ඇත

ඉර පායනවා බලන්න
මල් පූදිනවා බලන්න
සමනලයව බට්ටිච්චව
ටිකක් ළඟට වී බලන්න

සුළං රැළට තාල දෙන්න
සරුංගලය අතට දෙන්න
මතු බුදුවෙන මව්වරුනේ
හුස්ම ගන්න ඉඩක් දෙන්න