ඔයා ආදරෙයි ද මට ?
ප්‍රශ්නයක්.
පිළිතුරක අපේක්ෂාව
දෑස් පතුලක සැඟවුණු
අනන්තයෙ ඉරි අඳින.

හ්ම්ම්...... ඔව්නෙ.
ආ.... කොයිතරම් ආදරෙයි ද ?
අහ් !
අහස තරම්,පොළොව තරම්
නෑ නෑ විශ්වය තරම්.
ම්හු . මදි එහෙම කීව්වට.
මනින්නෙ කෝමද ?

සංසාරෙම හෙව්වත්
ලැබේවිද මිම්මක්.
මැන ගත්තත්
කියන්න කෝ වචන
භාෂාව දියුණු නෑනේ
ඒ හැඟීම විතර කරන්න
වචන දෙන්න තරම්.

හරි.
මට තේරුණාත් ඒ දේ
කිව්වත් ඔයාට
පුලුවන් වෙයිද තේරුම් ගන්න.

ඒ නිසා වෙන්නැති
බුදුන් වහන්සේත්
ආනන්ද හාමුරුවන්ගේ
සමහර ප්‍රශ්න මගැහැරියෙ.
උන් වහන්සෙ දැනන් උන්නට
කොයි තරම් පැහැදිලි කරත්
අනෙක් අයට තේරුම්
ගන්න බැරි නිසා

ඉතින් මම දෙනව උත්තරේ
මෙහෙම.
ඔයා මට ආදරේ තරමටම
මමත් ඔයාට ආදරෙයි .
දැන් මැන ගන්නකො ඔයා
මට තියෙන ආදරේ
බෑ නේද?
ඒ නිසා ඒ ප්‍රශ්නෙ අපි දාමූ
ඨපනීය ගොඩට.


මහනුවර
2024.08.19