ගිම්හානය ලබන කලට පාට පාට මල් පිපිලා
මී මැසි ගුමු ගුමු නාදය මලින් මලට රැව්දීලා
උදේ රැයින් කිචි බිචි හඬ වෙනදට වැඩියෙන් ඇසිලා
රන්වන් පාටින් හිරුරැස් ආකාසේ පැතිරීලා

ගස් වැල් දළු දා ලියලා මද සුළඟේ නැලවෙනවා
ඈත දිවෙන තණ නිල්ලේ පොඩි පිනි කැට දිලිසෙනවා
කුරුළු රෑන් රංචුපිටින් කොහෙදෝ පියඹා යනවා
උසට උසේ නිල් අහසේ පුළුන් වලා පාවෙනවා

පුංචි පුංචි ලේන පැටව් ගහින් ගහට පැන යනවා
හා පැටවුන් නිසසල වී අනතුරකට කන් දෙනවා
මුව පැටවුන් විදුලිය සේ පඳුරු උඩින් පැන යනවා
බලු පැටියා ඉව අල්ලා යුහුසුළු ගමනින් යනවා

දිය බුබුලක මිහිරි හඬින් සවනත පිනවා යනවා
වනමල් මත සමනලයින් තටු සලමින් රඟදෙනවා
ගස් අතරින් බේරුනු හිරු තුරු හිස් මත නැලවෙනවා
ගිම්හානයෙ උදා සිරිය අරුණෝදය සරසනවා


පුංචි අපට කවි සින්දු